ترکی نے ٹرمپ کے ’بورڈ آف پیس‘ میں شمولیت کی دعوت قبول کرلی، غزہ امن منصوبے میں نمائندگی کرے گا

ترکی نے امریکی صدر ڈونلڈ ٹرمپ کی جانب سے قائم کردہ ’بورڈ آف پیس‘ میں شمولیت کی دعوت قبول کرلی ہے۔

 غیر ملکی میڈیا کے مطابق ترکی کے وزیر خارجہ ہاکان فیدان صدر رجب طیب اردوان کی نمائندگی بورڈ میں کریں گے۔

صدر ٹرمپ نے کئی عالمی رہنماؤں کے ساتھ ساتھ صدر اردوان کو بھی اس بورڈ کی رکنیت کی دعوت دی تھی۔

 ترکی کے صدر نے پارلیمنٹ میں کہا کہ ہاکان فیدان بورڈ میں ترکی کی اعلیٰ سطحی نمائندگی کریں گے۔

’بورڈ آف پیس‘ کی باضابطہ تقریب جمعرات کو سوئٹزرلینڈ کے شہر ڈیووس میں عالمی اقتصادی فورم کے سالانہ اجلاس کے موقع پر ہوگی۔ 

ہاکان فیدان پہلے ہی ایک علیحدہ ’غزہ ایگزیکٹو بورڈ‘ کے رکن بھی ہیں، جس میں امریکی وزیر خارجہ مارکو روبیو، صدر ٹرمپ کے خصوصی ایلچی اسٹیو وٹکوف، سابق برطانوی وزیر اعظم ٹونی بلیئر اور جیرڈ کشنر شامل ہیں۔

پاکستان، متحدہ عرب امارات، بحرین، آذربائیجان، اسرائیل، مراکش اور مصر بھی بورڈ میں شمولیت کی دعوت قبول کرچکے ہیں۔ 

ٹرمپ کے نمائندہ خصوصی اسٹیو وٹکوف کے مطابق اب تک 20 سے 25 عالمی رہنما بورڈ آف پیس میں شامل ہوچکے ہیں۔