بلوچستان: آپریشن ’’رد الفتنہ-1‘‘ کامیابی سے مکمل، 216 دہشت گرد ہلاک

راولپنڈی: پاک فوج اور سکیورٹی فورسز نے بلوچستان میں بھارتی حمایت یافتہ دہشت گردوں کے خلاف رد الفتنہ-1 آپریشن کامیابی سے مکمل کر لیا۔

 اس آپریشن میں 216 دہشت گرد ہلاک کیے گئے، جس سے معصوم شہریوں، خاص طور پر خواتین اور بچوں کو نشانہ بنانے والے دہشت گرد نیٹ ورکس شدید نقصان اٹھانے پر مجبور ہوئے۔

آئی ایس پی آر کے مطابق 29 جنوری کو پنجگور اور ہرنائی کے علاقوں میں دہشت گردوں کی پناہ گاہوں پر کارروائی کی گئی، جس میں 41 دہشت گرد مارے گئے۔

 بعد ازاں مسلسل مشترکہ آپریشنز اور کلیئرنس آپریشنز سے دہشت گرد تنظیم کی قیادت اور عملی صلاحیتیں تباہ کی گئیں۔

غیر ملکی ساختہ ہتھیار، گولہ بارود اور دھماکہ خیز مواد بھی ضبط کیا گیا، جس سے یہ ظاہر ہوتا ہے کہ دہشت گرد بیرونی امداد کے زیر اثر تھے۔

 دہشت گرد حملوں میں 36 شہری شہید ہوئے جبکہ 22 سکیورٹی اہلکاروں نے قربانی دی۔

صدر، وزیراعظم اور وفاقی وزیر داخلہ نے فورسز کی بہادری کی تعریف کی اور دہشت گردی کے خاتمے کے لیے پاکستان کے عزم کا اعادہ کیا۔

یہ آپریشن بلوچستان اور پاکستان کے عوام کے غیر متزلزل عزم اور امن، اتحاد اور ترقی کی ترجیح کی علامت ہے۔