ایلون مسک کا ’لونر سٹی‘ منصوبہ: انسانیت کے مستقبل کے لیے چاند پر خودکار شہر بسانے کا اعلان

سپیس ایکس کے بانی اور دنیا کے امیر ترین شخص ایلون مسک نے اعلان کیا ہے کہ ان کی کمپنی اب مریخ کے بجائے چاند پر ایک خودکار ترقیاتی شہر قائم کرنے کو ترجیح دے رہی ہے، جسے انہوں نے ’لونر سٹی‘ کا نام دیا ہے۔

مسک کے مطابق چاند پر شہر بسانے کا مقصد انسانیت کے مستقبل کو محفوظ بنانا ہے، کیونکہ چاند مریخ کے مقابلے میں زیادہ قریب، تیز اور عملی راستہ فراہم کرتا ہے۔ 

مریخ پر مشن ہر 26 ماہ بعد ہی ممکن ہوتا ہے اور وہاں پہنچنے میں تقریباً 6 ماہ لگتے ہیں، جبکہ چاند کے لیے مشن ہر 10 دن بعد لانچ کیا جا سکتا ہے اور سفر صرف 2 دن میں مکمل ہوتا ہے۔

ایلون مسک نے بتایا کہ قمری شہر میں مصنوعی ذہانت، خودکار روبوٹس اور خلائی ڈیٹا سینٹرز کا استعمال کیا جائے گا، جس میں xAI کی تکنیکی معاونت شامل ہوگی۔ 

مریخ پر شہر بنانے کا منصوبہ مکمل طور پر ترک نہیں کیا گیا، لیکن اب یہ ثانوی ترجیح بن چکا ہے اور اس پر کام ممکنہ طور پر 5 سے 7 سال میں شروع ہوگا۔

واضح رہے کہ امریکا بھی 2028ء تک چاند پر واپسی اور 2030ء تک مستقل قمری اڈے قائم کرنے کا ہدف رکھتا ہے، جس میں چاند پر جوہری ری ایکٹر نصب کرنے کا بھی منصوبہ شامل ہے۔