روزانہ تین کپ چائے یا کافی دماغی بیماری ڈیمنشیا کے خطرے کو کم کر سکتی ہے

ایک نئی تحقیق میں انکشاف ہوا ہے کہ روزانہ دو سے تین کپ کیفین والی چائے یا کافی پینے سے ڈیمنشیا کے خطرے میں تقریباً 15 سے 20 فیصد کمی دیکھی گئی ہے۔

امریکہ میں 1 لاکھ 31 ہزار افراد کے صحت کے ریکارڈز کا تجزیہ کیا گیا، جس میں شرکاء سے روزانہ پینے والے کیفین والے گرم مشروبات کے بارے میں معلومات لی گئیں۔ 

چار دہائیوں کے دوران ان کی یادداشت اور مجموعی صحت کا جائزہ لیا گیا۔

نتائج کے مطابق زیادہ کیفین والی چائے یا کافی دماغی صلاحیتوں کو بہتر رکھنے میں مددگار ثابت ہوئی۔ 

تاہم، تین کپ سے زیادہ پینے کا کوئی اضافی فائدہ سامنے نہیں آیا۔ 

ڈی کیف یا کیفین کم والی کافی پینے والوں کے مقابلے میں کیفین والے مشروبات پینے والوں نے کچھ دماغی ٹیسٹوں میں بہتر کارکردگی دکھائی۔

ماہرین کا کہنا ہے کہ ابتدائی احتیاط اور کیفین کے مناسب استعمال سے دماغی صحت کو برقرار رکھنے میں مدد مل سکتی ہے۔