لائیو اسٹریم میں فلٹر کی خرابی، چینی انفلوئنسر کے ہزاروں فالوورز کم ہوگئے

بیجنگ: ایک چینی خاتون انفلوئنسر کی لائیو اسٹریم کے دوران بیوٹی فلٹر اچانک کام کرنا بند کر گیا، جس کے نتیجے میں ان کا قدرتی چہرہ ناظرین کے سامنے آگیا۔

رپورٹس کے مطابق وہ اپنے فالوورز کے ساتھ براہِ راست سیشن میں مصروف تھیں اور معمول کے مطابق بیوٹی فلٹر استعمال کر رہی تھیں، جو جلد کو زیادہ ہموار، آنکھوں کو بڑا اور چہرے کو زیادہ دلکش ظاہر کرتا ہے۔

 تاہم نشریات کے دوران فلٹر میں خرابی آگئی اور ان کی اصل شکل واضح ہوگئی، جس میں جلد کی قدرتی ساخت اور عمر کے اثرات نمایاں تھے۔

یہ ویڈیو سوشل میڈیا پر تیزی سے وائرل ہوگئی، جس کے بعد صارفین کی جانب سے مختلف ردعمل سامنے آئے۔

 کچھ افراد نے انہیں فالوورز کو گمراہ کرنے کا الزام دیا، جبکہ دیگر کا کہنا تھا کہ فلٹرز کا استعمال آن لائن کلچر اور تفریح کا حصہ ہے اور اسے منفی انداز میں نہیں دیکھا جانا چاہیے۔

واقعے کے بعد انفلوئنسر کے تقریباً ایک لاکھ چالیس ہزار فالوورز کم ہوگئے، جبکہ انہیں ملنے والے تحائف اور مالی معاونت میں بھی واضح کمی دیکھنے میں آئی۔ 

انفلوئنسر کی شناخت ظاہر نہیں کی گئی۔

ماہرین کا کہنا ہے کہ سوشل میڈیا پر فلٹرز کا استعمال عام ہو چکا ہے، تاہم ایسے واقعات یہ یاد دہانی کراتے ہیں کہ آن لائن دکھائی جانے والی تصاویر اور ویڈیوز ہمیشہ مکمل حقیقت کی عکاسی نہیں کرتیں۔

تجزیہ کاروں کے مطابق یہ واقعہ چین کی تیزی سے پھیلتی لائیو اسٹریمنگ صنعت میں خوبصورتی کے معیار، صداقت اور آن لائن شہرت سے متعلق نئی بحث کو جنم دے سکتا ہے۔