بنوں میں فورسز کے قافلے پر حملہ، لیفٹیننٹ کرنل اور سپاہی شہید، 5 دہشتگرد ہلاک

راولپنڈی: بنوں میں سکیورٹی فورسز کے قافلے پر بھارتی پراکسی فتنہ الخوارج نے حملہ کیا، جس کے نتیجے میں لیفٹیننٹ کرنل شہزادہ گل فراز اور سپاہی کرامت شاہ شہید ہو گئے، جبکہ آپریشن میں 5 دہشتگرد ہلاک کر دیے گئے۔

پاک فوج کے شعبہ تعلقات عامہ (آئی ایس پی آر) کے مطابق قافلے پر حملہ اس وقت کیا گیا جب انٹیلی جنس کی بنیاد پر خوارج کی موجودگی کا پتہ چلا، جن میں ایک خودکش بمبار بھی شامل تھا۔ 

فورسز کے اگلے دستے نے خودکش بمبار کو بروقت روکا اور اس کے ناپاک عزائم ناکام بنائے، جس سے بنوں شہر میں بڑے سانحے سے بچا گیا۔

آپریشن کے دوران خوارج کا سراغ لگا کر شدید فائرنگ کے تبادلے میں پانچ دہشتگرد ہلاک کر دیے گئے۔ 

تاہم، خوارج نے دھماکہ خیز مواد سے بھری گاڑی اگلے دستے کی گاڑی سے ٹکرا دی، جس سے لیفٹیننٹ کرنل شہزادہ گل فراز اور سپاہی کرامت شاہ شہید ہوئے۔

 لیفٹیننٹ کرنل شہزادہ گل فراز مانسہرہ سے تعلق رکھتے تھے اور بہادری اور جرات مندانہ کارروائیوں کے لیے معروف تھے۔

آئی ایس پی آر نے بتایا کہ خوارج رمضان کے مقدس مہینے میں افغان سرزمین استعمال کر کے دہشت گرد کارروائیاں کر رہے ہیں، اور ان کا اسلام سے کوئی تعلق نہیں۔ 

افغان طالبان حکومت خوارج کو پاکستان میں دہشت گردی کے لیے افغان سرزمین کے استعمال سے روکنے میں ناکام رہی ہے۔

پاک فوج نے واضح کیا کہ نیشنل ایکشن پلان اور وفاقی ایپکس کمیٹی کے تحت انسداد دہشت گردی کی کارروائیاں جاری رکھی جائیں گی تاکہ غیر ملکی سرپرستی میں چلنے والی دہشت گردی کے ناسور کا ملک سے مکمل خاتمہ کیا جا سکے۔