بھارتی فوج کے نائب سربراہ لیفٹیننٹ جنرل راہول سنگھ نے پاکستان کی عسکری صلاحیتوں کا اعتراف کرتے ہوئے کہا ہے کہ پاکستان نے معرکۂ حق میں بھارت کو نہ صرف عسکری، بلکہ تکنیکی میدان میں بھی پیچھے چھوڑ دیا۔
ایک حالیہ بیان میں جنرل راہول سنگھ نے تسلیم کیا کہ پاکستان کو بھارتی فوج کی نقل و حرکت اور اسٹریٹیجک تیاریوں کی مکمل معلومات تھیں، جس کی ایک وجہ چین سے ملنے والی انٹیلیجنس بھی تھی۔ انہوں نے کہا کہ پاکستان کی C4ISR اور الیکٹرانک وارفیئر صلاحیتوں نے بھارتی افواج کو حیران و پریشان کر دیا، اور بھارتی فضائی دفاعی نظام مطلوبہ کارکردگی دکھانے میں ناکام رہا۔
بھارتی ڈپٹی آرمی چیف نے بتایا کہ پاک فوج کے "الفتح راکٹ سسٹم" نے بھارتی تنصیبات کو مؤثر انداز میں نشانہ بنایا، جب کہ پاک فضائیہ کی ای وی ڈبلیو صلاحیتیں "آپریشن سندور" کے دوران بے مثال تھیں۔ انہوں نے شکوہ کیا کہ بھارت کو بروقت جنگی ساز و سامان میسر نہ آ سکا، اور چین نے بھارتی سرزمین کو اپنے اسلحے کی آزمائش کے لیے استعمال کیا۔
راہول سنگھ نے الزام لگایا کہ بھارت کو بیک وقت پاکستان، چین اور ترکی کے اشتراک کا سامنا تھا، جس سے فوج کو شدید دباؤ کا سامنا کرنا پڑا۔ تاہم تجزیہ کاروں کا کہنا ہے کہ یہ بھارتی شکست کی ناکام وضاحت ہے، جو اصل میں اندرونی سیاسی دباؤ اور دفاعی حکمت عملی کی ناکامی کی عکاس ہے۔
ماہرانِ دفاع کے مطابق، پاکستان نے معرکۂ حق میں اپنی تکنیکی صلاحیتوں کا صرف 10 سے 15 فیصد حصہ استعمال کیا، جبکہ باقی صلاحیتیں محفوظ رکھی گئیں۔ ان کا کہنا ہے کہ بھارت کی طرف سے تین دشمنوں کا شکوہ دراصل اپنی ناکامیوں سے توجہ ہٹانے کی کوشش ہے۔
تجزیہ کاروں کے مطابق، بھارتی حکومت اور عسکری قیادت کو تنقید کا سامنا بڑھتے ہوئے سیاسی انتشار، کمزور منصوبہ بندی اور عالمی سطح پر تنہائی کے باعث ہو رہا ہے۔ ماہرین نے واضح کیا ہے کہ مستقبل میں کسی بھی جارحیت کی صورت میں پاکستان، بھارت کے اہم صنعتی اور معاشی مراکز کو ہدف بنا سکتا ہے۔
دیکھیں
