غیر حاضری پر سزا، 14 سالہ طالب علم مدرسے میں استاد کے تشدد سے جاں بحق

news-banner

پاکستان - 22 جولائی 2025

ضلع سوات کے علاقے خوازہ خیلہ چالیار میں واقع ایک مدرسے میں 14 سالہ طالب علم فرحان استاد کے وحشیانہ تشدد سے جاں بحق ہوگیا۔ ابتدائی اطلاعات کے مطابق، فرحان کو غیر حاضری پر سخت سزا دی گئی، جس دوران اسے اس قدر مارا گیا کہ وہ موقع پر ہی دم توڑ گیا۔

پولیس نے فوری کارروائی کرتے ہوئے دو اساتذہ کو خوازہ خیلہ اسپتال سے گرفتار کرلیا ہے، جب کہ دیگر کی گرفتاری کے لیے چھاپے مارے جا رہے ہیں۔ فرحان کی لاش کو پوسٹ مارٹم کے لیے اسپتال منتقل کر دیا گیا ہے۔

مدرسے کے استاد محمد عمر، ان کے بیٹے احسان اللہ اور ایک اور استاد عبداللہ کے خلاف مقدمہ درج کر لیا گیا ہے۔ پولیس کا کہنا ہے کہ عبداللہ کو گرفتار کر لیا گیا ہے جبکہ دیگر دونوں ملزمان کی تلاش جاری ہے۔

واقعے پر عوامی حلقوں میں شدید غم و غصہ پایا جا رہا ہے اور مدرسوں میں طلبا کے تحفظ کے لیے مؤثر قوانین اور نگرانی کا مطالبہ زور پکڑ گیا ہے۔