گلگت بلتستان کے مختلف علاقوں میں حالیہ شدید بارشوں کے باعث آنے والا سیلاب تباہی کی نئی داستان چھوڑ گیا ہے۔ اب تک 9 افراد جاں بحق ہو چکے ہیں جن میں 2 خواتین اور 2 بچے بھی شامل ہیں، جبکہ 10 سے 12 افراد تاحال لاپتا ہیں۔
صوبائی حکومت کے ترجمان کے مطابق سیلابی ریلوں سے 500 سے زائد مکانات مکمل طور پر تباہ ہو چکے ہیں، جب کہ 12 کلومیٹر سے زائد سڑکیں، 27 پل اور 22 گاڑیاں بھی متاثر ہوئیں۔ سیلاب نے دکانیں، مویشی خانے اور ہزاروں فٹ قیمتی عمارتی لکڑی کو بھی بہا لیا ہے۔
ضلع دیامر سب سے زیادہ متاثر ہوا ہے جہاں شہریوں کو شدید مشکلات کا سامنا ہے۔ درجنوں افراد زخمی ہوئے جبکہ 300 سے زائد سیاحوں اور مسافروں کو ریسکیو کر لیا گیا ہے۔
امدادی کارروائیوں میں پاک فوج اور جی بی اسکاؤٹس بھرپور کردار ادا کر رہے ہیں، تاہم تیز بہاؤ اور لینڈ سلائیڈنگ کی وجہ سے ریسکیو آپریشن میں شدید رکاوٹیں پیش آ رہی ہیں۔ سڑکوں کی بحالی اور مواصلاتی نظام کی مرمت کا کام جاری ہے لیکن مشکلات بدستور برقرار ہیں۔
دیکھیں
