پاکستان اور کرغزستان کے درمیان تعاون میں پیشرفت، وزیر اعظم شہباز شریف کا اطمینان کا اظہار

news-banner

دنیا - 29 جولائی 2025

وزیر اعظم محمد شہباز شریف نے پاکستان اور کرغزستان کے درمیان مختلف شعبوں میں دوطرفہ تعاون کے فروغ پر اطمینان کا اظہار کرتے ہوئے اسے خوش آئند قرار دیا ہے۔

 

یہ بات انہوں نے اسلام آباد میں کرغزستان کی کابینہ کے ڈپٹی چیئرمین عزت مآب عادل بیسالوف کی قیادت میں آنے والے اعلیٰ سطحی وفد سے ملاقات کے دوران کہی۔ یہ وفد پاکستان اور کرغزستان کے مشترکہ بین الحکومتی کمیشن (IGC) کے پانچویں اجلاس میں شرکت کے لیے پاکستان کے دورے پر ہے۔

 

وزیر اعظم نے وفد کا خیرمقدم کرتے ہوئے اجلاس کے کامیاب انعقاد کو سراہا اور دونوں ممالک کے درمیان مفاہمتی یادداشتوں اور معاہدوں پر دستخط کو تجارت، توانائی، روابط اور عوامی سطح پر تبادلوں میں اضافے کی جانب ایک مثبت پیش رفت قرار دیا۔

 

انہوں نے ان معاہدوں پر عمل درآمد کے لیے پاکستان کے پختہ عزم کا اعادہ کیا اور زور دیا کہ ان فیصلوں کو عملی اور مؤثر اقدامات میں بدلنا ضروری ہے۔

 

عزت مآب عادل بیسالوف نے پاکستان کی جانب سے تعلقات کو فروغ دینے کی کوششوں کو سراہا اور امید ظاہر کی کہ IGC کے نتائج دونوں ممالک کے درمیان گہرے اور نتیجہ خیز تعاون کا سبب بنیں گے۔

 

دونوں رہنماؤں نے پاکستان اور کرغزستان کی عوام کی فلاح و بہبود کے لیے باہمی تعاون جاری رکھنے اور تعلقات کو مزید مضبوط بنانے کے عزم کا اعادہ کیا۔