بلوچستان کے 7 اضلاع میں ضمنی بلدیاتی انتخابات، پولنگ کا عمل جاری

پاکستان - 03 اگست 2025
کوئٹہ – بلوچستان کے سات اضلاع میں مختلف وجوہات کی بنا پر خالی ہونے والی بلدیاتی نشستوں پر ضمنی انتخابات کے لیے پولنگ کا عمل جاری ہے، جو شام 4 بجے تک مکمل ہو گا۔
صوبائی الیکشن کمیشن کے مطابق، ژوب، شیرانی، لورالائی، بارکھان، قلات، خضدار اور سوراب میں ایک سال کے دوران خالی ہونے والی 16 نشستوں پر آج ضمنی بلدیاتی انتخابات منعقد ہو رہے ہیں۔ ان انتخابات میں 25 امیدوار میدان میں ہیں۔
انتخابات میں مجموعی طور پر 106 جنرل کونسلرز ووٹ ڈالنے کے اہل ہیں۔ خواتین کی 6 نشستوں پر 15 امیدوار، مزدور کی 2 نشستوں پر 4 امیدوار، کسان کی 1 نشست پر 3 امیدوار جبکہ غیر مسلموں کی 7 نشستوں پر 3 امیدوار مد مقابل ہیں۔
واضح رہے کہ بلوچستان کے 32 اضلاع میں بلدیاتی انتخابات 29 مئی 2022 کو منعقد ہوئے تھے۔ بلدیاتی قوانین کے تحت، صوبے میں بلدیاتی اداروں میں خالی ہونے والی نشستوں پر سال میں ایک بار ضمنی انتخابات کرائے جاتے ہیں۔