ملک بھر میں بارشوں کا سلسلہ، شہریوں کو احتیاطی تدابیر کی ہدایت

news-banner

تازہ ترین - 04 اگست 2025

محکمہ موسمیات نے پیشگوئی کی ہے کہ آج سے 7 اگست تک ملک کے مختلف حصوں میں موسلادھار بارشیں متوقع ہیں۔ اسلام آباد، پنجاب، خیبر پختونخوا، کشمیر اور گلگت بلتستان میں بعض مقامات پر گرج چمک کے ساتھ تیز بارش کا امکان ظاہر کیا گیا ہے۔

 

اتوار اور پیر کی درمیانی شب اسلام آباد میں وقفے وقفے سے بارش ہوئی، جس سے موسم خوشگوار ہو گیا۔ کراچی کے مختلف علاقوں میں بھی ہلکی بارش اور بوندا باندی دیکھی گئی، جبکہ سندھ کے ساحلی علاقوں میں آئندہ دنوں میں جزوی طور پر ابر آلود موسم اور ہلکی بارش کی توقع ہے۔

 

محکمہ موسمیات کے مطابق 6 اگست کو بلوچستان میں شدید بارشوں کا امکان ہے، جس سے نشیبی علاقوں میں شہری سیلاب (اربن فلڈنگ) کا خدشہ ہے۔

 

اسپیل ویز کھولنے کے بعد راول ڈیم سے اضافی پانی کا اخراج جاری ہے تاکہ ممکنہ خطرات سے بچا جا سکے۔ دریں اثنا، دریائے سندھ کے کالا باغ، تونسہ، گڈو اور سکھر بیراج پر نچلے درجے کا سیلاب برقرار ہے۔

 

حکام نے نشیبی علاقوں میں رہائش پذیر شہریوں کو خبردار کیا ہے کہ وہ الرٹ رہیں، احتیاطی تدابیر اختیار کریں اور کسی بھی ہنگامی صورتحال میں مقامی انتظامیہ سے رابطہ رکھیں۔