پاکستانی شوبز انڈسٹری کی معروف اداکارہ درفشاں سلیم نے ساتھی اداکار بلال عباس کے ساتھ مبینہ رشتے اور نکاح سے متعلق زیرگردش افواہوں پر بالآخر اپنا مؤقف واضح کر دیا ہے۔
حالیہ انٹرویو میں انہوں نے مختلف موضوعات پر بات کرتے ہوئے بتایا کہ کسی رومانوی ڈرامے میں کام کرتے وقت اپنے ساتھی اداکار کے ساتھ ذہنی ہم آہنگی ضروری ہوتی ہے، تاکہ کیمرے کے سامنے کیمسٹری جاندار نظر آئے۔ انہوں نے کہا کہ بلال عباس کے ساتھ ان کا تعلق اسی بنیاد پر تھا جس کی وجہ سے ان کی جوڑی کو آغاز سے ہی ناظرین نے پسند کیا۔
ایک سوال کے جواب میں کہ جب لوگوں نے ان کی جوڑی کو اتنا پسند کیا کہ شادی کی افواہیں پھیل گئیں، درفشاں نے کہا کہ انہوں نے ایسی باتوں کو سنجیدہ نہیں لیا۔ ان کے مطابق شادی جیسے معاملات انتہائی نجی ہوتے ہیں، اور جب کوئی قدم اٹھایا جاتا ہے تو لوگ تصاویر شیئر کر کے خود ہی سب کو بتا دیتے ہیں، تو پھر کوئی کیوں لمبے عرصے تک ایسی بات خفیہ رکھے گا؟
انہوں نے واضح کیا کہ ان کے والد نے سکھایا ہے کہ ذاتی زندگی کو نجی رکھنا چاہیے، اور وہ اسی اصول پر عمل پیرا ہیں۔ تاہم نجی رکھنے اور خفیہ رکھنے میں فرق ہوتا ہے، اور وہ اس فرق کو سمجھتے ہوئے اپنی زندگی کے معاملات کو سنبھالتی ہیں۔
واضح رہے کہ درفشاں سلیم اور بلال عباس کی ڈرامہ سیریل عشق مرشد میں جوڑی کو بےحد سراہا گیا، جس کے بعد ان کے خفیہ نکاح کی خبریں سامنے آنے لگیں۔
دیکھیں
