پی ڈی ایم اے کی فلڈ ایڈوائزری، مون سون بارشوں کے ساتویں سپیل سے ممکنہ سیلاب کا خدشہ

news-banner

تازہ ترین - 11 اگست 2025

پنجاب ڈیزاسٹر مینجمنٹ اتھارٹی (پی ڈی ایم اے) نے مون سون بارشوں کے اگلے اسپیل کی پیشگوئی کے ساتھ فلڈ ایڈوائزری جاری کر دی ہے۔ ترجمان کے مطابق 13 اگست سے شروع ہونے والے ساتویں اسپیل کے باعث دریائے ستلج، راوی، چناب، جہلم اور ان سے ملحقہ ندی نالوں میں ممکنہ سیلاب کا خطرہ ہے، اور پانی کی سطح خطرناک حد تک بڑھ سکتی ہے۔


وزیراعلیٰ پنجاب کی ہدایات پر صوبے کے کمشنرز، ڈپٹی کمشنرز اور تمام متعلقہ محکموں کو الرٹ جاری کر دیا گیا ہے۔ لوکل گورنمنٹ، زراعت، آبپاشی، صحت، جنگلات، لائیو اسٹاک اور ٹرانسپورٹ کے اداروں کو پیشگی انتظامات مکمل کرنے کی ہدایت دی گئی ہے۔


ڈی جی پی ڈی ایم اے عرفان علی کاٹھیا نے کہا ہے کہ تمام محکمے ایمرجنسی میں فوری ردعمل کے لیے تیار رہیں، کنٹرول رومز میں عملہ 24 گھنٹے موجود ہو اور ریسکیو 1122 کی ٹیمیں ہائی الرٹ پر رہیں۔


انہوں نے مزید کہا کہ دریاؤں کے کنارے رہائش پذیر افراد اور مویشیوں کو محفوظ مقامات پر منتقل کیا جائے، جبکہ عوام کو ہدایت کی گئی ہے کہ جاری حفاظتی تدابیر پر سختی سے عمل کریں، کھلے پانی کے ذخائر میں نہانے سے گریز کریں اور ہنگامی انخلا کی صورت میں انتظامیہ سے تعاون کریں۔ شہریوں کو تازہ ترین موسم اور ہدایات کے لیے متعلقہ اداروں سے رابطے میں رہنے کا مشورہ دیا گیا ہے۔