ویسٹ انڈیز کا پاکستان کو تاریخی شکست، 34 سال بعد ون ڈے سیریز اپنے نام

news-banner

کھیل - 13 اگست 2025

ویسٹ انڈیز نے پاکستان کو 34 سال بعد ون ڈے سیریز میں شکست دے کر تاریخ دہرا دی۔ ٹرینیڈاڈ کے برائن لارا کرکٹ اسٹیڈیم میں کھیلے گئے تیسرے اور فیصلہ کن میچ میں میزبان ٹیم نے گرین شرٹس کو 202 رنز سے ہرا کر سیریز 1-2 سے اپنے نام کی۔

 

پاکستانی کپتان محمد رضوان نے ٹاس جیت کر ویسٹ انڈیز کو بیٹنگ کی دعوت دی، جہاں شائے ہوپ نے شاندار بیٹنگ کا مظاہرہ کرتے ہوئے 94 گیندوں پر ناقابل شکست 120 رنز اسکور کیے جبکہ جسٹن گریوز نے 24 گیندوں پر جارحانہ 43 رنز بنائے۔ ویسٹ انڈیز نے مقررہ 50 اوورز میں 6 وکٹوں پر 294 رنز بنائے۔ پاکستان کی جانب سے نسیم شاہ اور ابرار احمد نے 2، 2 وکٹیں حاصل کیں جبکہ محمد نواز اور صائم ایوب کے حصے میں ایک، ایک وکٹ آئی۔

 

ہدف کے تعاقب میں پاکستانی بیٹنگ لائن بری طرح ناکام رہی اور پوری ٹیم صرف 92 رنز پر ڈھیر ہوگئی۔ صائم ایوب، عبداللہ شفیق اور کپتان محمد رضوان بغیر کوئی رن بنائے آؤٹ ہوئے، بابر اعظم 9 رنز بنا سکے۔ سلمان علی آغا 30 اور محمد نواز 23 رنز کے ساتھ نمایاں رہے۔

 

میزبان ٹیم کے جیڈن سیلز نے شاندار بولنگ کرتے ہوئے 6 کھلاڑی آؤٹ کیے جبکہ گداکیش موتی نے 2 اور روسٹن چیز نے ایک وکٹ حاصل کی۔ شائے ہوپ میچ کے بہترین کھلاڑی اور جیڈن سیلز سیریز کے بہترین کھلاڑی قرار پائے۔