محکمہ موسمیات کی ملک بھر میں شدید بارشوں کی پیشگوئی، شہری اور متعلقہ ادارے الرٹ

news-banner

تازہ ترین - 13 اگست 2025

محکمہ موسمیات نے آئندہ دنوں میں ملک کے بیشتر حصوں میں بارشوں کی شدت بڑھنے کی پیشگوئی کرتے ہوئے متعلقہ اداروں اور شہریوں کو الرٹ رہنے کی ہدایت کر دی ہے۔

 

ترجمان پنجاب ڈیزاسٹر مینجمنٹ اتھارٹی (پی ڈی ایم اے) کے مطابق آج اسلام آباد، پنجاب کے مختلف اضلاع، بالائی خیبر پختونخوا، آزاد کشمیر اور گلگت بلتستان میں کہیں ہلکی اور کہیں موسلادھار بارش کا امکان ہے۔ اس وقت مغربی ہوائیں شمالی اور بالائی علاقوں پر اثر انداز ہو رہی ہیں، جو بالائی پنجاب، خیبرپختونخوا اور شمالی بلوچستان میں نمی اور ٹھنڈک لا رہی ہیں۔

 

پی ڈی ایم اے نے بتایا کہ 17 اگست سے ان مغربی ہواؤں کی شدت بڑھے گی، جس سے بارشوں کا سلسلہ مزید تیز ہو جائے گا۔ 14 سے 17 اگست کے دوران اسلام آباد، راولپنڈی، لاہور، گوجرانوالہ، سرگودھا، ایبٹ آباد، مانسہرہ، مظفرآباد، میرپور، گلگت اور سکردو میں موسلادھار بارش کا امکان ہے، جبکہ بعض مقامات پر تیز ہواؤں اور گرج چمک کے ساتھ بارش بھی ہو سکتی ہے۔

 

مزید کہا گیا کہ 17 اگست سے خلیج بنگال سے مرطوب ہواؤں کا نیا سلسلہ داخل ہوگا جو مغربی ہواؤں کے ساتھ مل کر ایک طاقتور موسمی نظام بنائے گا۔ اس کے نتیجے میں 18 سے 21 اگست کے دوران کراچی، حیدرآباد، سکھر، کوئٹہ، پشاور، اسلام آباد، لاہور، فیصل آباد اور دیگر علاقوں میں شدید بارشیں متوقع ہیں۔

 

پی ڈی ایم اے نے خبردار کیا ہے کہ اس دوران پہاڑی علاقوں میں لینڈ سلائیڈنگ، شہری اور نشیبی علاقوں میں اربن فلڈنگ، اور ندی نالوں میں طغیانی کا خطرہ ہے۔ عوام کو ہدایت کی گئی ہے کہ غیر ضروری سفر سے گریز کریں، کھلے مقامات سے دور رہیں، ندی نالوں کے قریب رہنے والے افراد نقل مکانی پر غور کریں اور حفاظتی اقدامات کو یقینی بنائیں۔