ووہان میں تیسری ہنگور کلاس آبدوز پی این ایس ایم مانگرو کی لانچنگ

news-banner

دنیا - 16 اگست 2025

چین کے شہر ووہان میں ووچانگ شپ بلڈنگ انڈسٹری گروپ کمپنی لمیٹڈ شوانگلیو بیس پر پاکستان نیوی کی تیسری ہنگور کلاس آبدوز پی این ایس ایم مانگرو کی لانچنگ تقریب منعقد ہوئی۔ اس موقع پر ڈپٹی چیف آف نیول اسٹاف (پراجیکٹ II) وائس ایڈمرل عبدالصمد مہمانِ خصوصی تھے۔

 

تقریب سے خطاب کرتے ہوئے وائس ایڈمرل عبدالصمد نے خطے کے موجودہ جیو اسٹریٹجک حالات کے تناظر میں میری ٹائم سکیورٹی کی اہمیت اجاگر کی اور اس عزم کا اظہار کیا کہ پاک بحریہ قومی مفادات کے تحفظ اور محفوظ و مشترکہ سمندری ماحول کے فروغ کے لیے ہمہ وقت پرعزم ہے۔

 

انہوں نے ہنگور کلاس آبدوزوں کی خصوصیات پر روشنی ڈالتے ہوئے کہا کہ جدید ہتھیاروں اور سینسرز سے لیس یہ آبدوزیں خطے میں طاقت کے توازن اور امن کے استحکام میں کلیدی کردار ادا کریں گی۔

 

وائس ایڈمرل نے چائنا شپ بلڈنگ اینڈ آف شور انٹرنیشنل کمپنی لمیٹڈ (CSOC) کی کاوشوں کو سراہتے ہوئے منصوبے کی پیش رفت پر اطمینان کا اظہار کیا اور کہا کہ یہ منصوبہ پاک-چین اسٹریٹجک شراکت داری کو ایک نئی جہت دے گا۔

 

یاد رہے کہ پاکستان نے CSOC کے ساتھ آٹھ ہنگور کلاس آبدوزوں کے حصول کا معاہدہ کیا تھا، جن میں سے چار چین میں اور چار کراچی شپ یارڈ اینڈ انجینئرنگ ورکس لمیٹڈ میں ٹرانسفر آف ٹیکنالوجی (ToT) کے تحت تیار کی جائیں گی۔

 

تقریب میں پاکستان اور چین کے اعلیٰ حکام کے علاوہ ووچانگ شپ بلڈنگ اور CSOC کے نمائندے بھی شریک ہوئے۔