آسٹریلوی کرکٹ لیجنڈ بوب سمپسن 89 برس کی عمر میں انتقال کر گئے

news-banner

کھیل - 16 اگست 2025

آسٹریلیا کے سابق ٹیسٹ کپتان اور عالمی شہرت یافتہ کوچ بوب سمپسن 89 برس کی عمر میں دنیا سے رخصت ہو گئے۔ ان کے انتقال کی تصدیق کرکٹ آسٹریلیا اور مقامی میڈیا نے کی۔

 

بوب سمپسن نے اپنے شاندار کیریئر میں 62 ٹیسٹ میچوں میں آسٹریلیا کی نمائندگی کرتے ہوئے 4,869 رنز بنائے، جن میں 10 سنچریاں شامل تھیں۔ 1960 اور 70 کی دہائی میں وہ اپنی جرات مندانہ بیٹنگ اور شاندار فیلڈنگ کے باعث پہچانے جاتے تھے۔ ان کی 311 رنز کی تاریخی اننگز آج بھی یادگار ہے، جس نے انہیں عظیم بیٹسمینوں کی صف میں لاکھڑا کیا۔

 

کپتانی کے بعد انہوں نے کوچنگ میں اپنی صلاحیتوں کا لوہا منوایا۔ 1980 کی دہائی کے آخر میں جب آسٹریلوی کرکٹ شدید بحران کا شکار تھی، انہوں نے ٹیم کو نئی زندگی دی اور ڈسپلن اور ٹیم ورک کے ذریعے 1987 کا ورلڈ کپ جتوانے میں اہم کردار ادا کیا۔ ان کی رہنمائی ہی نے اس ٹیم کی بنیاد رکھی جس نے 1990 اور 2000 کی دہائی میں عالمی کرکٹ پر راج کیا۔

 

کرکٹ آسٹریلیا نے اپنے تعزیتی بیان میں کہا کہ بوب سمپسن ایک شاندار بیٹسمین، کامیاب کپتان اور غیر معمولی کوچ تھے جنہوں نے آسٹریلوی کرکٹ کو نئی جہت دی۔ دنیا بھر کے کرکٹ حلقوں اور ماہرین نے ان کے انتقال پر گہرے دکھ کا اظہار کرتے ہوئے کہا ہے کہ ان کی خدمات ہمیشہ کرکٹ کی تاریخ میں سنہری حروف سے لکھی جائیں گی۔