چین میں پاک بحریہ کی تیسری ہنگور کلاس آبدوز پی این ایس مین گرو کی لانچنگ

news-banner

پاکستان - 16 اگست 2025

آئی ایس پی آر کے مطابق چین میں پاک بحریہ کی تیسری ہنگور کلاس آبدوز پی این ایس مین گرو کی لانچنگ تقریب منعقد ہوئی۔

تقریب کے مہمان خصوصی ڈپٹی چیف آف نیول اسٹاف (پراجیکٹ-2) وائس ایڈمرل عبد الصمد تھے۔ تقریب میں پاکستان اور چین کے اعلیٰ حکام نے بھی شرکت کی۔

وائس ایڈمرل عبد الصمد نے اپنے خطاب میں کہا کہ پاک بحریہ قومی مفادات کے تحفظ اور محفوظ و مشترکہ ماحول کے فروغ کے لیے پرعزم ہے۔ انہوں نے کہا کہ ہنگور کلاس آبدوزیں خطے میں طاقت کے توازن اور امن و استحکام کو برقرار رکھنے میں کلیدی کردار ادا کریں گی۔

ان کا کہنا تھا کہ یہ منصوبہ پاک چین دوستی میں ایک نئی جہت کا اضافہ ہے۔

واضح رہے کہ پاکستان اور چین کے درمیان 8 ہنگور کلاس آبدوزوں کے حصول کا معاہدہ ہوا تھا، جن میں سے 4 چین میں اور 4 کراچی شپ یارڈ میں ٹیکنالوجی کی منتقلی کے تحت تیار کی جائیں گی۔ یہ آبدوزیں جدید ہتھیاروں اور سینسرز سے لیس ہوں گی جو دور تک اہداف کو نشانہ بنانے کی صلاحیت رکھتی ہیں۔