10 سالہ برطانوی بچی کا کارنامہ، شطرنج کے گرینڈ ماسٹر کو شکست دینے والی کم عمر ترین کھلاڑی

انٹرٹینمنٹ - 16 اگست 2025

برطانیہ کی 10 سالہ بچی بودھانا سیوانندن نے شطرنج کی تاریخ میں نیا ریکارڈ قائم کر دیا، وہ کسی گرینڈ ماسٹر کو شکست دینے والی سب سے کم عمر خاتون کھلاڑی بن گئی ہیں۔

اتوار کو لیورپول میں ہونے والی 2025 برٹش چیس چیمپیئن شپ کے فائنل راؤنڈ میں بودھانا نے 60 سالہ گرینڈ ماسٹر پیٹ ویلز کو شکست دی۔

بین الاقوامی شطرنج فیڈریشن (فیڈے) کے مطابق بودھانا کی عمر اس وقت 10 سال، 5 ماہ اور 3 دن ہے، جس کے ساتھ انہوں نے امریکی کھلاڑی کاریسا یِپ کا 2019 کا ریکارڈ توڑ دیا۔ اس وقت کاریسا یِپ کی عمر 10 سال، 11 ماہ اور 20 دن تھی۔

اس شاندار کامیابی کے بعد بودھانا کو ویمن انٹرنیشنل ماسٹر کا خطاب مل گیا، جو خواتین کے اعلیٰ ترین ٹائٹل ویمن گرینڈ ماسٹر سے ایک درجہ کم ہے۔ یاد رہے کہ شطرنج کا سب سے بڑا اعزاز گرینڈ ماسٹر کا ٹائٹل ہے، جو اس وقت عالمی چیمپئن گوکیش دوما راجو اور سابق عالمی نمبر ایک میگنس کارلسن کے پاس ہے۔

دلچسپ بات یہ ہے کہ بودھانا کے خاندان میں شطرنج کا کوئی پس منظر نہیں۔ اس کے والد نے 2024 میں بی بی سی کو بتایا تھا کہ بودھانا نے پانچ سال کی عمر میں کووڈ وبا کے دوران شطرنج کھیلنا سیکھا، جب ایک دوست نے تحفے میں شطرنج بورڈ دیا تھا۔