ملک کے بیشتر علاقوں میں بارش کی پیش گوئی، پنجاب، سندھ اور خیبر پختونخوا میں موسلادھار بارش کا امکان

news-banner

تازہ ترین - 18 اگست 2025

محکمہ موسمیات کے مطابق پیر کے روز پاکستان کے بیشتر حصوں میں مطلع جزوی ابر آلود رہے گا اور مختلف شہروں میں گرج چمک کے ساتھ بارش متوقع ہے۔

 

رپورٹ کے مطابق بالائی خیبر پختونخوا، خطہ پوٹھوہار، کشمیر اور شمالی پنجاب کے کچھ مقامات پر موسلادھار بارش کا امکان ہے۔ اسلام آباد، راولپنڈی، لاہور، سیالکوٹ، گجرانوالہ، جہلم، فیصل آباد، ملتان، سرگودھا اور ڈیرہ غازی خان سمیت پنجاب کے کئی اضلاع میں بارش اور تیز ہواؤں کے ساتھ گرج چمک متوقع ہے۔

 

سندھ کے شہروں کراچی، حیدرآباد، بدین، سکھر، لاڑکانہ اور تھرپارکر میں بھی بارش کی پیش گوئی ہے، جبکہ تھرپارکر کے کچھ علاقوں میں تیز بارش ہو سکتی ہے۔ بلوچستان کے ژوب، موسیٰ خیل، کوہلو، سبی، خضدار، گوادر، پسنی اور لسبیلہ میں بھی بارش کے امکانات ہیں۔

 

اسی طرح خیبر پختونخوا کے پشاور، سوات، دیر، چترال، مانسہرہ، ایبٹ آباد اور کوہاٹ سمیت گلگت بلتستان اور کشمیر میں بھی گرج چمک کے ساتھ بارش متوقع ہے۔

 

گزشتہ 24 گھنٹوں کے دوران مختلف شہروں میں بارش ریکارڈ کی گئی، اسلام آباد کے سید پور میں سب سے زیادہ 75 ملی میٹر اور تھرپارکر کے نگر پارکر میں 50 ملی میٹر بارش ریکارڈ کی گئی۔ دوسری جانب ملک کے بعض علاقوں میں موسم گرم اور مرطوب رہا، جبکہ نوکنڈی، دالبندین، دادو اور جیکب آباد میں سب سے زیادہ درجہ حرارت 43 ڈگری سینٹی گریڈ ریکارڈ کیا گیا۔