لاہور میں فروری 2026 سے ٹرام سروس کا آغاز، فیصل آباد اور گوجرانوالہ میں بھی میٹرو ٹرین چلانے کا اعلان

news-banner

کاروبار - 18 اگست 2025

پنجاب حکومت نے اعلان کیا ہے کہ لاہور میں ٹرام سروس آئندہ سال فروری 2026 سے باضابطہ طور پر شروع کر دی جائے گی۔


وزیر ٹرانسپورٹ پنجاب بلال اکبر خان کے مطابق ٹھوکر نیاز بیگ سے ہربنس پورہ تک ٹرام کا کامیاب ٹیسٹ مکمل ہو چکا ہے۔ اس ٹرام میں 270 نشستوں کی گنجائش ہوگی اور منصوبے پر تقریباً 30 لاکھ ڈالر لاگت آئے گی۔

 

انہوں نے بتایا کہ اس منصوبے کے لیے پنجاب نیسپاک اور پی ایم اے کے افسران نے چین کا دورہ کیا۔ صوبائی وزیر نے مزید کہا کہ فیصل آباد اور گوجرانوالہ میں بھی میٹرو ٹرین منصوبے شروع کیے جا رہے ہیں۔ فیصل آباد میٹرو ٹرین روزانہ 3 لاکھ مسافروں کو سفری سہولت فراہم کرے گی جس پر 110 ملین ڈالر لاگت آئے گی، جبکہ گوجرانوالہ میٹرو منصوبہ یومیہ 1 لاکھ 40 ہزار مسافروں کو سہولت دے گا اور اس کی لاگت 50 ملین ڈالر ہوگی۔

 

بلال اکبر خان نے کہا کہ لاہور میں گاڑیوں اور موٹرسائیکلوں کی تعداد میں اضافے سے ماحولیاتی آلودگی میں تیزی سے اضافہ ہو رہا ہے، ان منصوبوں کا مقصد ماحول دوست ٹرانسپورٹ کے ذریعے آلودگی پر قابو پانا ہے۔