لاہور سیشن کورٹ نے امیر بالاج قتل کیس میں گوگی بٹ کی عبوری ضمانت میں 13 اکتوبر تک توسیع کر دی

لاہور: سیشن کورٹ لاہور نے امیر بالاج قتل کیس میں نامزد ملزم خواجہ عقیل عرف گوگی بٹ کی عبوری ضمانت میں توسیع کر دی ہے۔ سماعت سیشن جج سید نجف کاظمی نے کی۔

سماعت کے دوران گوگی بٹ کے وکیل نے مؤقف اختیار کیا کہ ان کی جانب سے مہیا کیا گیا ریکارڈ پولیس وصول نہیں کر رہی اور اسے کیس کے ریکارڈ کا حصہ نہیں بنایا جا رہا۔

اس پر تفتیشی افسر نے عدالت کو بتایا کہ جو بھی ریکارڈ فراہم کیا گیا ہے، وہ ضمنی رپورٹ کا حصہ بنا دیا گیا ہے، اور ملزم گوگی بٹ 4 سے 5 مرتبہ تفتیش میں شامل ہو چکے ہیں، جس کا تمام ریکارڈ کیس فائل میں موجود ہے۔

درخواست گزار کے وکیل نے مزید کہا کہ ان کے سینئر وکیل موجود نہیں، اس لیے کیس کو کل تک ملتوی کیا جائے تاکہ دلائل پیش کیے جا سکیں۔

گوگی بٹ کے وکیل نے عدالت کو آگاہ کیا کہ سیکیورٹی خدشات کی وجہ سے ان کے موکل کے بار بار عدالت میں پیش ہونے میں مشکلات پیش آتی ہیں۔

جج سید نجف کاظمی نے ریمارکس دیتے ہوئے کہا کہ کل کی تاریخ نہیں دی جا سکتی کیونکہ انتظامی معاملات بھی دیکھنے ہوتے ہیں۔ انہوں نے ہدایت کی کہ اگر کل فریقین نہیں آ سکتے تو پیر کے روز لازمی پیش ہوں اور دلائل مکمل کریں، کیونکہ آئندہ مزید مہلت نہیں دی جائے گی۔

عدالت نے سماعت ملتوی کرتے ہوئے خواجہ عقیل عرف گوگی بٹ کی عبوری ضمانت میں 13 اکتوبر تک توسیع کر دی۔