جامعہ کراچی کا المناک حادثہ: پوائنٹ بس کی ٹکر سے طالبہ انیقہ سعید جاں بحق، طلبہ کا احتجاج

کراچی: جامعہ کراچی میں افسوسناک واقعہ پیش آیا جہاں سوشل ورک ڈیپارٹمنٹ کی سیکنڈ ایئر کی طالبہ انیقہ سعید پوائنٹ بس کی زد میں آ کر جاں بحق ہو گئیں۔

پولیس کے مطابق، حادثہ اس وقت پیش آیا جب انیقہ سعید بس سے اتر رہی تھیں کہ ڈرائیور نے اچانک گاڑی ریورس کی جس کے نتیجے میں وہ بس کے نیچے آ گئیں اور موقع پر ہی دم توڑ گئیں۔

واقعے کے بعد جامعہ میں افسوس اور سوگ کی فضا پھیل گئی، جبکہ طلبہ کی بڑی تعداد نے احتجاج کرتے ہوئے یونیورسٹی انتظامیہ کے خلاف نعرے بازی کی۔

مظاہرین طلبہ کا کہنا تھا کہ جامعہ کے اندر ٹریفک کا کوئی مؤثر نظام موجود نہیں، نہ اسپیڈ بریکرز ہیں اور نہ ہی سائن بورڈز، جس سے طلبہ کی زندگیوں کو خطرات لاحق ہیں۔

انہوں نے حادثے کی تحقیقات، ذمہ داروں کے خلاف کارروائی اور جاں بحق طالبہ کے اہلخانہ کے لیے مالی امداد کا مطالبہ کیا۔

واقعے کی اطلاع ملتے ہی پولیس اور امدادی ادارے موقع پر پہنچ گئے۔ مبینہ ٹاؤن پولیس کے مطابق، جامعہ کی پوائنٹ بس کے ڈرائیور کو حراست میں لے لیا گیا ہے۔

تاہم، انیقہ سعید کے اہلخانہ نے قانونی کارروائی سے انکار کرتے ہوئے لاش کی فوری حوالگی کا مطالبہ کیا ہے۔ پولیس کا کہنا ہے کہ ورثا سے بات چیت جاری ہے اور واقعے کی تحقیقات مکمل رپورٹ کی شکل میں تیار کی جا رہی ہیں۔