وزیراعظم کی ہدایت پر فلسطین کے لیے امداد کی 24ویں کھیپ روانہ

وزیراعظم پاکستان کی خصوصی ہدایت پر قومی آفات سے نمٹنے والے ادارے (این ڈی ایم اے) نے فلسطین کے عوام کے لیے امدادی سامان کی 24ویں کھیپ روانہ کر دی۔

تفصیلات کے مطابق، الخدمت فاؤنڈیشن کے تعاون سے روانہ کی گئی اس کھیپ کا وزن 100 ٹن ہے، جسے علامہ اقبال انٹرنیشنل ایئرپورٹ لاہور سے ایک خصوصی پرواز کے ذریعے بھیجا گیا۔

امدادی سامان میں بنیادی طور پر راشن بیگز شامل ہیں جن میں آٹا، چاول، کوکنگ آئل، چنے، تیار کھانے اور ڈبہ بند پھل شامل ہیں۔

این ڈی ایم اے کے مطابق اب تک فلسطین کے لیے بھیجی جانے والی مجموعی 24 کھیپوں میں امدادی سامان کا وزن 2,327 ٹن ہو چکا ہے۔

امدادی سامان کی روانگی کے موقع پر این ڈی ایم اے، وزارتِ خارجہ، حکومتِ پاکستان اور الخدمت فاؤنڈیشن کے نمائندگان موجود تھے۔

 اس موقع پر کہا گیا کہ پاکستان کے عوام اور حکومت مشکل وقت میں فلسطینی بھائیوں کے ساتھ مکمل یکجہتی کے ساتھ کھڑے ہیں اور ان کی مدد کا سلسلہ جاری رکھا جائے گا۔