پاکستان تحریک انصاف (پی ٹی آئی) کے بانی و سابق وزیراعظم عمران خان نے اڈیالہ جیل سے خیبرپختونخوا حکومت کو ہدایت دی ہے کہ وہ کوہستان کرپشن اسکینڈل پر فوری طور پر عوام کے سامنے وضاحت پیش کرے۔
یہ ہدایت عمران خان کی مشیر اطلاعات خیبرپختونخوا بیرسٹر سیف کے ساتھ ہونے والی ایک اہم ملاقات کے دوران سامنے آئی۔ یہ ملاقات ایک روز قبل اڈیالہ جیل میں ہوئی جس میں مختلف سیاسی و حکومتی امور پر تبادلہ خیال کیا گیا۔
ذرائع کے مطابق عمران خان نے دوران ملاقات کہا:
کوہستان اسکینڈل سے ہماری حکومت اور جماعت کی ساکھ متاثر ہو رہی ہے۔ فوری طور پر واضح کیا جائے کہ اصل ذمہ دار کون ہیں۔”
عمران خان نے بلین ٹری سونامی منصوبے کو دوبارہ فعال کرنے کی بھی ہدایت کی اور کہا کہ ماحولیاتی تبدیلی جیسے عالمی چیلنج سے نمٹنے کے لیے صوبائی حکومت کو مزید مؤثر اقدامات کرنے ہوں گے۔
انہوں نے واضح کیا:
“خیبرپختونخوا حکومت کو صحت اور تعلیم جیسے بنیادی شعبوں میں بہتری پر کوئی سمجھوتہ نہیں کرنا چاہیے۔ عوامی خدمات کے معیار کو بلند رکھنا ہماری ترجیح ہونی چاہیے۔”
بیرسٹر سیف نے بھی تصدیق کی کہ عمران خان سے ملاقات میں صوبائی بجٹ، کوہستان اسکینڈل اور دیگر اہم معاملات زیرِ بحث آئے۔ ان کا کہنا تھا:
"چیئرمین عمران خان جیل میں ہونے کے باوجود پارٹی اور پالیسی امور پر گہری نظر رکھے ہوئے ہیں اور مسلسل رہنمائی کر رہے ہیں۔
ذرائع کا کہنا ہے کہ خیبرپختونخوا حکومت آئندہ چند روز میں کوہستان کرپشن اسکینڈل پر باضابطہ وضاحت اور مؤقف جاری کرے گی تاکہ حکومت کی شفافیت اور احتساب کے بیانیے کو برقرار رکھا جا سکے۔
دیکھیں
