متنازع بیان پر وزیراعلیٰ کے پی اور امیدوار شہرناز عمر ایوب الیکشن کمیشن طلب

الیکشن کمیشن پاکستان نے حویلیاں جلسے میں دئیے گئے متنازع بیان پر کارروائی کرتے ہوئے وزیراعلیٰ خیبر پختونخوا سہیل آفریدی اور ضمنی انتخاب میں امیدوار شہرناز عمر ایوب کو طلب کر لیا ہے۔

ای سی پی کے مطابق جلسے کے دوران وزیراعلیٰ نے ضلعی انتظامیہ، پولیس اور انتخابی عملے کو دھمکیاں دیں جبکہ عوام کو اشتعال دلانے کی کوشش کی۔ بیان میں کہا گیا کہ جلسے میں ایک مفرور مجرم بھی موجود تھا جس کی اہلیہ ضمنی انتخاب لڑ رہی ہیں۔

الیکشن کمیشن نے کہا کہ وزیراعلیٰ کے غیر ذمہ دارانہ طرزِ عمل نے این اے 18 ہری پور کے پُرامن ضمنی انتخاب کو خطرے میں ڈال دیا۔ اسی بنا پر دونوں شخصیات کو الیکشن ایکٹ 2017 اور ضابطۂ اخلاق کی خلاف ورزی پر ہفتے کے روز پیش ہونے کے لیے نوٹس جاری کیے گئے ہیں۔

الیکشن کمشنر خیبر پختونخوا کو ہدایت دی گئی ہے کہ وہ فوری طور پر چیف سیکرٹری اور آئی جی سے ملاقات کرکے سکیورٹی انتظامات مضبوط بنائیں اور رپورٹ کمیشن کو ارسال کریں۔

مزید کہا گیا کہ سیکریٹری داخلہ اور سیکریٹری دفاع کو بھی خطوط بھیجے جائیں، تاکہ 23 نومبر کے ضمنی انتخاب میں فوج اور سول آرمڈ فورسز کی تعیناتی اور فول پروف سکیورٹی کو یقینی بنایا جا سکے۔ ڈسٹرکٹ ریٹرننگ افسران، پریزائیڈنگ افسران، انتخابی عملے اور ووٹرز کی مکمل حفاظت پر زور دیا گیا ہے۔

کمیشن نے واضح کیا کہ ضمنی انتخابات میں کسی بھی عہدیدار یا فرد کی جانب سے مداخلت، دباؤ یا خلل ڈالنے کی کوشش پر سخت قانونی کارروائی کی جائے گی۔ صوبائی الیکشن کمشنر پنجاب کو بھی اسی نوعیت کی ہدایات جاری کی گئی ہیں۔