وفاقی آئینی عدالت کے چیف جسٹس امین الدین خان کا پہلا پیغام: آئینی عدالت عوامی اعتماد اور انصاف کی مضبوط علامت ہوگی

وفاقی آئینی عدالت کے چیف جسٹس امین الدین خان نے کہا ہے کہ بنیادی حقوق کا تحفظ آئینی عدالت کی اولین ترجیح ہوگی اور آئین کی تشریح شفافیت، آزادی اور دیانتداری کے اصولوں کے مطابق کی جائے گی۔

چیف جسٹس نے آئینی عدالت کے قیام کے بعد اپنے پہلے پیغام میں اسے قومی آئینی جدوجہد میں ایک اہم سنگِ میل قرار دیا اور کہا کہ یہ عدالت ریاستِ پاکستان کے قانون کی حکمرانی اور آئینِ اسلامی جمہوریہ پاکستان کے دیرپا وعدے کی تجدید کرتی ہے۔

انہوں نے مزید کہا کہ یہ عدالت صرف قضائی ادارہ نہیں بلکہ ایک مقدس امانت ہے، جو شہریوں کی زندگیوں، آزادیوں اور امنگوں پر براہِ راست اثر ڈالتی ہے۔ اپنے ادارہ جاتی سفر کے آغاز پر عزم کیا گیا ہے کہ عدالت دیانت، غیر جانبداری اور علمی بصیرت کی اعلیٰ مثال قائم کرے گی۔

چیف جسٹس نے کہا کہ آئندہ پیش آنے والے ہر معاملے کو آئین کی بالادستی، انصاف کے اصولوں اور عدالتی وقار کے ساتھ نمٹایا جائے گا، اور ایسی عدالتی روایت قائم کی جائے گی جو مدلل فیصلوں، ادارہ جاتی وقار اور عوامی اعتماد پر مبنی ہو۔

امین الدین خان نے کہا کہ وفاقی آئینی عدالت کا قیام پاکستان میں آئینی بالادستی کی محافظ اور آنے والی نسلوں کے لیے عدل و انصاف کی ایک مضبوط علامت کے طور پر یاد رکھا جائے گا، اور دعا کی کہ اللہ تعالیٰ انہیں دانش، انکسار اور آئین سے غیر متزلزل وابستگی کے ساتھ اپنے فرائض ادا کرنے کی توفیق دے۔