گورنر سندھ کامران ٹیسوری: اڈیالہ میں بیٹھا شخص مغرور ہے، پی ٹی آئی سے مذاکرات ختم ہونے چاہئیں

گورنر سندھ کامران خان ٹیسوری نے کہا ہے کہ اڈیالہ میں بیٹھا شخص تکبر کا مظاہرہ کر رہا ہے اور ان کی رائے میں پاکستان تحریک انصاف سے مذاکرات بند کر دینے چاہئیں۔

مزار قائد پر حاضری کے بعد میڈیا سے گفتگو کرتے ہوئے انہوں نے کہا کہ پی ٹی آئی کے بعض دوست مذاکرات کو ماننے کے لیے تیار نہیں جبکہ جن عناصر نے ملک کی ترقی میں رکاوٹیں ڈالیں، ان سے بات چیت کا کوئی جواز نہیں بنتا۔

گورنر سندھ نے کہا کہ قائداعظم محمد علی جناح کا یوم پیدائش قربانی اور عزمِ نو کی یاد دہانی ہے، قائداعظم نے اپنی حکمت عملی اور اصولوں کے ذریعے پاکستان حاصل کیا، اگر آج کی سیاسی قیادت اور نوجوان ان اصولوں پر عمل کریں تو ملک ترقی کر سکتا ہے۔

کامران ٹیسوری نے کہا کہ سال 2025 پاکستان کی تاریخ میں سنہرے الفاظ سے لکھا جائے گا، پاکستان نے اپنے سے کئی گنا طاقتور ملک کو شکست دے کر خود کو فاتح قوم ثابت کیا ہے، اب معیشت کے میدان میں بھی کامیابی حاصل کی جائے گی۔

انہوں نے کہا کہ عالمی سطح پر پاکستان توجہ کا مرکز بن چکا ہے اور بین الاقوامی جریدے پاکستان کو کامیاب جبکہ بھارت کو ناکام قرار دے رہے ہیں، فیلڈ مارشل کی دوٹوک پالیسی نے پاکستان کو عالمی مقام دلایا ہے۔

گورنر سندھ کے مطابق بہترین عسکری حکمت عملی سے قومی اعتماد بحال ہوا ہے، سی پیک کا دوسرا مرحلہ شروع ہو چکا ہے اور پاکستان معاشی ترقی کے لیے اہم فیصلے کر رہا ہے، نجکاری کا عمل شفاف انداز میں آگے بڑھ رہا ہے جبکہ پی آئی اے کی نجکاری گیم چینجر ثابت ہو سکتی ہے۔

انہوں نے کہا کہ افغانستان کے معاملے پر پاکستان نے واضح اور دوٹوک مؤقف اختیار کیا ہے اور دنیا کو انتہا پسندی کے خلاف اپنے فیصلے سے آگاہ کر دیا ہے۔

 ایک سوال کے جواب میں انہوں نے بتایا کہ وفاقی حکومت نے خالد مقبول اور ایم کیو ایم کو 20 ارب روپے کا ترقیاتی پیکج دیا ہے جس پر عملدرآمد میں وہ اپنا کردار ادا کریں گے۔