وزیراعظم کا کہنا: بھارتی جبر کشمیری عوام کے حوصلے پست کرنے میں ناکام

اسلام آباد: وزیراعظم پاکستان شہباز شریف نے کہا ہے کہ بھارتی جبر و تشدد کے تمام ہتھکنڈے کشمیری عوام کے عزم اور حوصلے کو کمزور کرنے میں ناکام رہے ہیں۔

یومِ حقِ خودارادیت کے موقع پر اپنے پیغام میں وزیراعظم نے یاد دلایا کہ 5 جنوری کو اقوام متحدہ کی سلامتی کونسل کی قراردادوں میں کشمیری عوام کے حقِ خودارادیت کو تسلیم کیا گیا تھا۔

 5 جنوری 1949ء کو یو این کمیشن برائے پاکستان و بھارت نے بھی ایک تاریخی قرارداد منظور کی تھی، جس میں ریاست جموں و کشمیر کے مستقبل کا فیصلہ آزادانہ اور غیر جانبدارانہ رائے شماری سے کرنے کا عہد کیا گیا تھا۔

وزیراعظم نے افسوس کا اظہار کرتے ہوئے کہا کہ بھارت کے غیر قانونی قبضے کے باعث یہ وعدہ آج تک پورا نہیں ہو سکا۔

 انہوں نے مزید کہا کہ مقبوضہ کشمیر کے عوام 8 دہائیوں سے بھارتی قابض افواج کے مظالم کا سامنا کر رہے ہیں اور بین الاقوامی برادری کو بھارت کے جابرانہ اقدامات کے خاتمے کے لیے اقدامات اٹھانے چاہئیں۔