پاکستان میں نیپا وائرس کے ممکنہ پھیلاؤ پر الرٹ جاری

اسلام آباد: بھارت میں نیپا وائرس کے پھیلاؤ کے خدشے کے پیش نظر پاکستان نے الرٹ جاری کرتے ہوئے احتیاطی اقدامات کر لیے ہیں۔

حکومت نے تمام داخلی راستوں، بشمول بین الاقوامی ائیرپورٹس، بندرگاہوں اور زمینی سرحدوں پر 100 فیصد اسکریننگ لازمی قرار دی ہے۔

 تمام مسافروں، عملے اور ڈرائیورز کی مکمل جانچ کی جائے گی اور بارڈر ہیلتھ سروسز کی منظوری کے بغیر کسی کو ملک میں داخل ہونے کی اجازت نہیں ہوگی۔

تمام مسافروں کی گزشتہ 21 دن کی سفری اور عبوری تاریخ کی تصدیق لازمی ہوگی، اور نیپا متاثرہ علاقوں سے آنے یا گزرنے والے مسافروں کی خصوصی نگرانی کی جائے گی۔

 تھرمل اسکریننگ اور طبی معائنہ ہر نقطۂ داخلی پر ضروری ہے، اور بخار یا دیگر علامات ظاہر ہونے پر فوری کارروائی کی ہدایت دی گئی ہے۔

نیپا وائرس کی علامات میں بخار، سر درد، سانس کی تکلیف اور اعصابی مسائل شامل ہیں۔ 

مشتبہ مریض کو فوراً آئسولیٹ کیا جائے اور متعلقہ اداروں کو رپورٹ کیا جائے۔ غلط یا ناقص سفری معلومات فراہم کرنے والوں کے خلاف قانونی کارروائی کی سفارش کی گئی ہے۔