مشرق وسطیٰ کی کشیدگی، ٹی 20 ورلڈ کپ کی بڑی ٹیمیں بھارت میں پھنس گئیں

مشرقِ وسطیٰ میں بڑھتی ہوئی کشیدگی کے باعث فضائی سفر متاثر ہونے سے عالمی بیس اوور کرکٹ کپ میں شریک چند ٹیمیں بھارت میں پھنس گئیں۔

اطلاعات کے مطابق ویسٹ انڈیز اور جنوبی افریقا کی قومی کرکٹ ٹیمیں اس وقت بھارت سے روانہ نہیں ہو سکیں۔

عالمی کرکٹ کونسل نے ویسٹ انڈیز کی ٹیم کے لیے خصوصی طیارے کا انتظام کیا تھا، مگر فضائی آمدورفت کی اجازت نہ ملنے کے باعث ٹیم ابھی تک بھارت سے روانہ نہیں ہو سکی۔

ذرائع کے مطابق ویسٹ انڈیز کے کھلاڑی اس صورتحال سے پریشان ہیں اور جلد اپنے وطن واپس جانا چاہتے ہیں۔ 

اس سے پہلے ٹیم کے کوچ نے بھی بھارت سے واپسی کی خواہش کا اظہار کیا تھا۔

بھارتی ذرائع ابلاغ کے مطابق ویسٹ انڈیز کے ساتھ ساتھ جنوبی افریقا کی ٹیم کو بھی اسی طرح کی مشکلات کا سامنا ہے اور دونوں ٹیموں کی روانگی کے بارے میں ابھی تک حتمی معلومات سامنے نہیں آئیں۔

خطے میں کشیدگی کے باعث کئی ممالک کی فضائی حدود بند ہونے سے ٹیمیں سفر نہیں کر پا رہیں۔ 

تاہم جنوبی افریقا کے چند کھلاڑی ممکنہ طور پر آئندہ دو طرفہ مقابلوں کے لیے نیوزی لینڈ روانہ ہو سکتے ہیں۔

جنوبی افریقا اور نیوزی لینڈ کے درمیان پندرہ مارچ سے پانچ بیس اوور مقابلوں پر مشتمل سیریز شیڈول ہے، جبکہ باقی کھلاڑیوں کی روانگی ابھی تک غیر یقینی ہے۔