پاکستان میں قطر کے سفیر علی بن مبارک الخاطر نے گورنر سندھ کامران خان ٹیسوری کے اعزاز میں خصوصی ظہرانے کا اہتمام کیا۔ یہ تقریب گورنر سندھ کی حج سے واپسی کے بعد منعقد کی گئی، جس کا مقصد پاکستان اور قطر کے مابین برادرانہ تعلقات کو مزید فروغ دینا تھا۔
تقریب میں مختلف برادر اسلامی ممالک کے سفراء نے بھی شرکت کی، جس سے مسلم دنیا میں اتحاد، یکجہتی اور سفارتی روابط کو تقویت ملی۔
گورنر ٹیسوری کی آمد پر قطری سفیر اور سفارتی عملے نے ان کا پرتپاک استقبال کیا اور حج کی سعادت کی کامیاب ادائیگی پر دلی مبارکباد پیش کی۔
تقریب کے دوران گفتگو کرتے ہوئے گورنر سندھ نے ایران-اسرائیل کشیدگی کے تناظر میں قطر کے مفاہمتی اور مؤثر کردار کو سراہا اور اسے علاقائی امن و استحکام کے لیے ایک ذمہ دارانہ کاوش قرار دیا۔
انہوں نے مزید کہا کہ:"پاکستان اور قطر کے مابین تعلقات باہمی احترام، مشترکہ اقدار اور اسلامی بھائی چارے پر مبنی ہیں، جو وقت کے ساتھ ساتھ مزید مضبوط ہو رہے ہیں، خاص طور پر معاشی تعاون اور علاقائی سفارت کاری کے شعبوں میں۔"
دیگر اسلامی ممالک کے سفیروں کی موجودگی نے اس تقریب کی سفارتی اہمیت کو مزید اجاگر کیا اور مسلم دنیا کے درمیان مکالمے اور تعاون کے فروغ کا پیغام دیا۔
دیکھیں
