وزیر دفاع خواجہ آصف نے کہا ہے کہ قومی ایئر لائن پی آئی اے کو برطانیہ کی ایئر سیفٹی لسٹ سے نکالا جانا ایک تاریخی سنگ میل ہے، جو وزیراعظم شہباز شریف کی حکومت کی کوششوں سے حاصل ہوا۔ انہوں نے اسے قومی وقار کی بحالی قرار دیا جو ہمیشہ یاد رکھا جائے گا۔
اسلام آباد میں پریس کانفرنس کے دوران خواجہ آصف نے سابق حکومت کو شدید تنقید کا نشانہ بناتے ہوئے کہا کہ پی ٹی آئی کے دور حکومت میں اس وقت کے وزیر ہوا بازی غلام سرور خان نے اپنی ہی ایئر لائن پر بے بنیاد الزامات لگائے، جس سے عالمی اداروں کو پابندیاں لگانے کا جواز ملا۔ انہوں نے الزام عائد کیا کہ غلام سرور کے بیان سے اربوں روپے کا نقصان ہوا اور سب سے بڑا نقصان پاکستان کی ساکھ کو پہنچا۔
انہوں نے کہا کہ موجودہ حکومت کی تین سالہ مسلسل کوششوں کے بعد اب پی آئی اے نئے دور میں داخل ہو رہی ہے، اور یہ ایک اہم کامیابی ہے۔ ان کے مطابق اب اگلا مرحلہ پی آئی اے کی نجکاری کا ہے تاکہ ادارے کو جدید اور منافع بخش بنایا جا سکے۔
وزیر دفاع نے بتایا کہ وزیراعظم شہباز شریف نے ذاتی طور پر اس عمل کی نگرانی کی اور رپورٹس لیتے رہے۔ اب قومی ایئر لائن کو نئے طیارے، بہتر روٹس اور جدید نظام دیا جائے گا تاکہ اوورسیز پاکستانی سہولت سے وطن واپس آ سکیں۔
انہوں نے افسوس کا اظہار کرتے ہوئے کہا کہ پابندی کے باعث پی آئی اے اوورسیز پاکستانیوں کی میتیں مفت وطن منتقل نہیں کر سکی، جس پر لوگوں کو ہزاروں ڈالر خرچ کرنا پڑے اور بعض کو برطانیہ میں ہی تدفین کرنی پڑی۔
خواجہ آصف نے یہ بھی انکشاف کیا کہ ایئر بلیو کو بھی برطانیہ میں آپریشن کی اجازت مل گئی ہے، اور پاکستان کی سول ایوی ایشن اتھارٹی کو اب یورپی اداروں کا مکمل اعتماد حاصل ہے۔ انہوں نے وفاقی وزیر سعد رفیق اور سی اے اے کو اس کامیابی پر خراجِ تحسین پیش کیا۔
دیکھیں
