چین کی ایک نجی کمپنی نے ملازمین کی صحت مند طرزِ زندگی کو فروغ دینے کے لیے سالانہ بونس کی پالیسی میں انوکھا اضافہ کر دیا ہے۔ اب بونس صرف محنت پر نہیں بلکہ جسمانی فٹنس، خاص طور پر دوڑنے کی کارکردگی پر بھی دیا جائے گا۔
گوانگ دونگ دونگپو پیپر کمپنی کے مطابق نئی پالیسی کے تحت ملازمین کو سالانہ بونس اس شرط پر دیا جائے گا کہ وہ باقاعدگی سے دوڑ لگائیں اور مقررہ فاصلہ مکمل کریں۔
چیئرمین کے اعلان کے مطابق جو ملازم ہر ماہ 100 کلومیٹر (تقریباً 62 میل) دوڑنے کا ہدف حاصل کرے گا، اُسے سال کے اختتام پر تنخواہ کا 130 فیصد بطور بونس دیا جائے گا۔ جبکہ 50 کلومیٹر (تقریباً 31 میل) مکمل کرنے والے ملازمین کو ایک ماہ کی اضافی تنخواہ بطور بونس دی جائے گی۔
چیئرمین نے وضاحت کی کہ اس پالیسی کا مقصد صرف انعام دینا نہیں بلکہ ملازمین کی جسمانی اور ذہنی صحت کو بہتر بنانا ہے تاکہ وہ زیادہ پُرجوش اور کارآمد ثابت ہوں۔
یہ انوکھا فیصلہ سوشل میڈیا پر موضوع بحث بن چکا ہے، جہاں صارفین اسے دلچسپ، مثبت مگر چیلنجنگ قدم قرار دے رہے ہیں۔
دیکھیں
