لاہور ہائیکورٹ نے وزیر اعظم شہباز شریف کے صاحبزادے سلمان شہباز کے خلاف مقدمہ درج کرنے کے سیشن کورٹ کے فیصلے پر عملدرآمد روک دیا ہے۔
چیف جسٹس کی ہدایت پر جسٹس عالیہ نیلم نے کیس کی سماعت کی اور فریقین کو نوٹسز جاری کرتے ہوئے 31 جولائی تک جواب طلب کر لیا۔
سلمان شہباز کی جانب سے ایڈووکیٹ جاوید ارشد بھٹی عدالت میں پیش ہوئے۔ درخواست میں مؤقف اختیار کیا گیا کہ سیشن کورٹ نے 10 جولائی کو قانون کے تقاضے پورے کیے بغیر اور حقائق کا جائزہ لیے بغیر چیک ڈس آنر کے کیس میں مقدمہ درج کرنے کا حکم دیا۔
درخواست گزار نے استدعا کی کہ سیشن کورٹ کا حکم کالعدم قرار دیا جائے اور حتمی فیصلے تک مقدمہ درج کرنے کے عمل کو روک دیا جائے۔
عدالت نے ابتدائی دلائل سننے کے بعد سیشن کورٹ کا حکم معطل کرتے ہوئے کیس کی مزید سماعت 31 جولائی تک ملتوی کر دی۔
دیکھیں
