نائب وزیرِاعظم اور وزیرِ خارجہ اسحاق ڈار نے اقوامِ متحدہ کی سلامتی کونسل سے خطاب میں کہا ہے کہ فلسطین اور کشمیر کے مسائل کا تاحال حل نہ ہونا عالمی برادری کے دوہرے معیار کو ظاہر کرتا ہے۔ انہوں نے کہا کہ پاکستان ہمیشہ سفارت کاری کو ترجیح دیتا رہا ہے اور تنازعات کا پُرامن حل چاہتا ہے۔
اسحاق ڈار نے کہا کہ پاکستان اقوامِ متحدہ کے چارٹر پر مکمل عملدرآمد کے لیے پُرعزم ہے، اور آج سلامتی کونسل میں عالمی امن پر ہونے والا مباحثہ انتہائی اہمیت کا حامل ہے۔
انہوں نے اس موقع پر پاکستان کی جانب سے پیش کی گئی قرارداد کی منظوری کو خوش آئند قرار دیا، جو تنازعات کے پرامن حل کے طریقہ کار کو مؤثر بنانے سے متعلق ہے۔
نائب وزیرِاعظم نے اقوام متحدہ کے سیکریٹری جنرل سے ملاقات کے دوران بھارت کے غیر قانونی اقدامات پر مبنی ایک مفصل چارچ شیٹ بھی پیش کی۔
انہوں نے کہا کہ دنیا بھر میں جاری تنازعات نے کشیدگی کو جنم دیا ہے، اور ان کا پرامن اور کثیرالجہتی حل ہی عالمی امن کی ضمانت ہے۔ پاکستان عالمی سطح پر امن کے قیام کے لیے ایک فعال اور مثبت کردار ادا کرنے کے لیے تیار ہے۔
اسحاق ڈار کا کہنا تھا کہ فلسطین میں 58 ہزار سے زائد افراد شہید ہو چکے ہیں، جبکہ پاکستان کی خارجہ پالیسی ریاستوں کی خودمختاری، باہمی احترام اور عدم مداخلت کے اصولوں پر قائم ہے۔ انہوں نے مزید کہا کہ پانی 24 کروڑ پاکستانیوں کی زندگی کا اہم ذریعہ ہے، جسے تنازعات سے دور رکھنا ناگزیر ہے۔
دیکھیں
