وزیراعظم شہباز شریف نے ملک بھر کے ہوائی اڈوں پر غیر ملکی مسافروں کی سہولت کے لیے خصوصی امیگریشن کاؤنٹرز قائم کرنے کا حکم جاری کر دیا ہے۔ اس اقدام کا مقصد نہ صرف بین الاقوامی سیاحوں، سرمایہ کاروں اور تجارتی وفود کو سہولت فراہم کرنا ہے بلکہ پاکستان میں سیاحت، سرمایہ کاری اور کاروباری سرگرمیوں کو فروغ دینا بھی ہے۔
وزیراعظم آفس سے جاری کردہ اعلامیہ کے مطابق یہ علیحدہ امیگریشن کاؤنٹرز مسافروں کے لیے امیگریشن کا عمل تیز اور آسان بنائیں گے، جس سے مجموعی طور پر وقت کی بچت ہوگی۔
اعلامیہ میں مزید کہا گیا ہے کہ غیر ملکیوں کے لیے مخصوص کاؤنٹرز بننے سے نہ صرف ان کے لیے سہولت میں اضافہ ہوگا بلکہ دیگر پاکستانی مسافروں کے لیے بھی قطاروں میں کمی آئے گی، جس سے مجموعی عمل مزید مؤثر ہو جائے گا۔
وزیراعظم آفس نے اس اقدام کو حکومت کی اُس جامع پالیسی کا حصہ قرار دیا ہے جس کا مقصد پاکستان کو غیر ملکی سیاحوں، سرمایہ کاروں اور عالمی تجارتی وفود کے لیے ایک خوش آمدیدی اور کشش سے بھرپور ملک کے طور پر پیش کرنا ہے۔
دیکھیں
