نیب کی جانب سے جاری کردہ باقاعدہ نوٹس کے مطابق، اعظم سواتی کو ہدایت کی گئی ہے کہ وہ 23 جون 2025 کو صبح 11 بجے نیب ہیڈکوارٹر، فیز 5، حیات آباد، پشاور میں تحقیقاتی ٹیم کے سامنے پیش ہوں۔
نوٹس میں یہ بھی درج ہے کہ انہیں سال 2024 میں "کوہستان ایسوسی ایٹ اینڈ بلڈرز" نامی فرم سے موصول ہونے والی بینک ادائیگیوں کا مکمل ریکارڈ ساتھ لانا ہوگا۔ نیب کا کہنا ہے کہ سینیٹر کے پاس ایسے شواہد موجود ہو سکتے ہیں جو اس اہم انکوائری میں فیصلہ کن کردار ادا کر سکتے ہیں۔
نوٹس میں خبردار کیا گیا ہے کہ اگر سینیٹر نے تعاون نہ کیا تو نیب آرڈیننس 1999 کے تحت قانونی کارروائی کا حق محفوظ رکھتا ہے۔
ذرائع کا کہنا ہے کہ اس اسکینڈل میں متعدد سرکاری منصوبوں کے فنڈز کے غلط استعمال کا شبہ ہے، اور مبینہ طور پر کچھ فنڈز ایک مخصوص تعمیراتی فرم کے ذریعے نکلوائے گئے ہیں۔ اس فرم کے مالی معاملات نیب کی چھان بین کے دائرہ کار میں آ چکے ہیں۔
اعظم سواتی کی جانب سے اب تک اس طلبی پر کوئی باضابطہ ردِ عمل سامنے نہیں آیا، تاہم سیاسی حلقوں میں اس پیشرفت کو خاصی اہمیت دی جا رہی ہے، اور یہ امکان ظاہر کیا جا رہا ہے کہ تحقیقات کا دائرہ دیگر افراد تک بھی بڑھ سکتا ہے۔
نیب حکام کا کہنا ہے کہ وہ سرکاری فنڈز کے شفاف استعمال کو یقینی بنانے کے لیے ہر سطح پر کارروائی جاری رکھیں گے، خصوصاً پسماندہ اضلاع میں جہاں ترقیاتی منصوبے اکثر کرپشن کا شکار ہوتے ہیں۔
مزید پیشرفت اعظم سواتی کے نیب میں پیش ہونے کے بعد متوقع ہے۔
دیکھیں
