پنجاب میں شدید سیلاب، 14 لاکھ سے زائد افراد متاثر، 25 جاں بحق

پنجاب ڈیزاسٹر مینجمنٹ اتھارٹی (پی ڈی ایم اے) کی رپورٹ کے مطابق دریائے راوی، چناب اور ستلج میں شدید طغیانی کے باعث 14 لاکھ 60 ہزار سے زائد افراد متاثر جبکہ 1692 موضع جات زیرِ آب آ گئے ہیں۔

پی ڈی ایم اے کے مطابق سیلاب سے اب تک 25 قیمتی جانیں ضائع ہو چکی ہیں جبکہ متاثرین کی تعداد میں مزید اضافے کا خدشہ ہے۔ حکام کا کہنا ہے کہ جب تک سیلابی پانی سندھ میں داخل نہیں ہوتا، پنجاب ہائی الرٹ پر ہے اور سندھ حکومت کو اس بابت پیشگی اطلاع دے دی گئی ہے۔

رپورٹ میں بتایا گیا کہ 2 لاکھ 65 ہزار سے زائد افراد کو محفوظ مقامات پر منتقل کیا گیا ہے۔ صوبے بھر میں 355 ریلیف کیمپ قائم کیے گئے جن میں 1372 متاثرہ افراد مقیم ہیں، جبکہ 6656 افراد کو طبی امداد فراہم کی گئی۔ اب تک مجموعی طور پر 90 ہزار 348 افراد اور ایک لاکھ 54 ہزار 980 مویشیوں کو محفوظ مقامات پر منتقل کیا گیا ہے۔

اعداد و شمار کے مطابق دریائے چناب میں 991 دیہات ڈوب گئے، جن میں سیالکوٹ کے 395، جھنگ کے 127، ملتان کے 124، چنیوٹ کے 48، گجرات کے 66، خانیوال کے 51، حافظ آباد کے 45، سرگودھا کے 41، منڈی بہاالدین کے 35 اور وزیرآباد کے 19 دیہات شامل ہیں۔

راوی میں نارووال کے 75، شیخوپورہ کے 4 اور ننکانہ صاحب کا ایک گاؤں زیرِ آب آیا ہے، جہاں سے 11 ہزار افراد اور 4500 مویشیوں کو محفوظ مقامات پر منتقل کیا گیا۔

ستلج میں 361 دیہات متاثر ہوئے جن میں قصور کے 72، اوکاڑہ کے 86، پاکپتن کے 24، ملتان کے 27، وہاڑی کے 23، بہاولنگر کے 104 اور بہاولپور کے 25 دیہات شامل ہیں۔ یہاں سے ایک لاکھ 27 ہزار سے زائد افراد اور 70 ہزار مویشیوں کو محفوظ مقامات پر منتقل کیا گیا ہے۔