وزیراعلیٰ سندھ کا دریائے سندھ میں ممکنہ سیلاب پر الرٹ، بیراجوں کی صورتحال پر بریفنگ

وزیراعلیٰ سندھ مراد علی شاہ نے خبردار کیا ہے کہ منگل اور بدھ کی درمیانی شب دریائے سندھ میں سیلابی صورتحال پیدا ہونے کا خدشہ ہے، لہٰذا بند اور نہری نظام کی سخت نگرانی کی جائے۔

ترجمان کے مطابق وزیر آبپاشی جام خان شورو نے وزیراعلیٰ کو دریائی صورتحال پر بریفنگ دی جس میں بتایا گیا کہ گڈو بیراج پر پانی کی آمد 3 لاکھ 83 ہزار اور اخراج 3 لاکھ 50 ہزار کیوسک ہے۔ سکھر بیراج پر پانی کی آمد 3 لاکھ 13 ہزار اور اخراج 2 لاکھ 59 ہزار کیوسک ریکارڈ کیا گیا، جبکہ کوٹری بیراج پر پانی کی آمد 2 لاکھ 64 ہزار اور اخراج 2 لاکھ 33 ہزار کیوسک ہے۔ فی الحال تمام بیراجوں کی صورتحال قابو میں ہے۔

مراد علی شاہ نے ہدایت کی کہ تمام متعلقہ محکمے اور انتظامیہ مکمل طور پر متحرک رہیں جبکہ صوبائی وزراء صورتحال پر مسلسل نگرانی جاری رکھیں۔ انہوں نے کہا کہ دریا کے کناروں اور کچے کے علاقے میں رہائش پذیر افراد انتظامیہ سے تعاون کریں تاکہ کسی بھی ہنگامی صورتحال سے بروقت نمٹا جا سکے۔