بھارت کا ایک اور بڑا سیلابی ریلہ، پنجاب سمیت کئی علاقے زیرِ آب

بھارت نے سلال ڈیم کے تمام گیٹ کھول دیے جس کے نتیجے میں ایک اور بڑا سیلابی ریلہ پاکستان کی جانب بڑھ رہا ہے۔ پنجاب حکومت کے ذرائع کے مطابق 8 لاکھ کیوسک پانی پر مشتمل یہ ریلہ دو روز بعد ہیڈ مرالہ پہنچے گا۔

گوجرانوالہ کی ضلعی انتظامیہ کا کہنا ہے کہ آنے والے سیلابی ریلے کی اطلاع ملتے ہی دریائے چناب کے کنارے واقع آبادیوں میں اعلانات کروائے جا رہے ہیں اور ممکنہ نقصان سے نمٹنے کے لیے ہنگامی تیاریاں شروع کر دی گئی ہیں۔

بہاولپور میں دریائے ستلج کے ریلوں نے تباہی مچا دی، تحصیل صدر بستی یوسف، احمد والہ کھوہ سمیت 7 بند ٹوٹ گئے، جس سے ہزاروں ایکڑ زرعی زمینیں ڈوب گئیں۔ متاثرہ آبادی اور مویشیوں کی محفوظ مقامات پر منتقلی کشتیوں کے ذریعے جاری ہے۔

جھنگ کے گاؤں جنگران میں پھنسے افراد کو نکالنے کے لیے ریسکیو آپریشن جاری ہے جبکہ مظفر گڑھ میں دریائے چناب کی سطح مسلسل بلند ہو رہی ہے۔ دوسری جانب عارف والا میں ایک بارات بھی سیلاب میں پھنس گئی، تاہم ریسکیو اہلکاروں نے بروقت کارروائی کرتے ہوئے دولہا اور باراتیوں کو بحفاظت نکال لیا۔

افسوسناک واقعے میں ایک ماں بیٹے کو بچانے کے لیے سیلابی ریلے میں کود گئی اور گہرے پانی میں ڈوب کر جاں بحق ہوگئی۔