سیلاب ریلیف آپریشن کے دوران جاں بحق اسسٹنٹ کمشنر پتوکی فرقان احمد خان کو اعلیٰ سول ایوارڈ دینے کا فیصلہ

پنجاب حکومت نے فلڈ ریلیف آپریشن کے دوران جاں بحق ہونے والے اسسٹنٹ کمشنر پتوکی فرقان احمد خان کو اعلیٰ سول ایوارڈ دینے اور ان کے اہلخانہ کو ایک کروڑ روپے گرانٹ فراہم کرنے کا فیصلہ کیا ہے۔ وزیراعلیٰ پنجاب مریم نواز شریف نے منظوری دیتے ہوئے کہا کہ مرحوم کی قربانی اور خدمات کو ہمیشہ یاد رکھا جائے گا۔

مرحوم فرقان احمد خان کینسر کے مرض کے باوجود چار دن تک مسلسل ریلیف ڈیوٹی سرانجام دیتے رہے۔ انہوں نے پتوکی کے سیلاب زدہ علاقوں میں متاثرین کو خوراک، ادویات اور دیگر سہولیات فراہم کرنے میں کلیدی کردار ادا کیا۔

وزیراعلیٰ مریم نواز نے انہیں خراجِ تحسین پیش کرتے ہوئے کہا کہ عوام کی خدمت میں اپنی جان قربان کرنے والے حقیقی ہیرو ہیں، فرقان احمد کی فرض شناسی ہمیشہ یاد رکھی جائے گی۔ واضح رہے کہ وہ گزشتہ روز ریلیف آپریشن کے دوران دل کا دورہ پڑنے سے انتقال کر گئے تھے۔