غزہ میں اسرائیلی بمباری، خاتون صحافی اسلام موحارب عابد شہید

غزہ پر اسرائیلی جارحیت کے نتیجے میں ایک اور فلسطینی صحافی جام شہادت نوش کر گئیں۔ فلسطینی حکومتی میڈیا آفس کے مطابق القدس الیوم سیٹلائٹ چینل سے وابستہ خاتون صحافی اسلام موحارب عابد اتوار کے روز فضائی حملے میں نشانہ بنیں۔

میڈیا آفس نے اس واقعے کی شدید مذمت کرتے ہوئے کہا کہ اسرائیل دانستہ طور پر صحافیوں کو نشانہ بنا رہا ہے تاکہ حقائق کو دبایا جا سکے۔ بیان میں عالمی صحافتی تنظیموں اور فیڈریشنز سے مطالبہ کیا گیا کہ وہ غزہ میں صحافیوں کے خلاف جاری جرائم پر آواز بلند کریں۔

اعداد و شمار کے مطابق اکتوبر 2023 سے اب تک غزہ میں شہید ہونے والے صحافیوں اور میڈیا ورکرز کی تعداد 278 تک پہنچ گئی ہے۔ حالیہ دنوں میں النصر اسپتال پر بمباری میں بھی 5 صحافی شہید ہوئے تھے جبکہ اس سے قبل الجزیرہ کے رپورٹر انس الشریف اپنے ساتھیوں سمیت اسرائیلی حملے کا نشانہ بنے تھے۔