ٹانک میں نیا کیس رپورٹ، پاکستان میں پولیو سے متاثرہ بچوں کی تعداد 24 ہوگئی

پاکستان میں پولیو کے مکمل خاتمے کی کوششوں کو ایک اور دھچکا لگا ہے، کیونکہ جنوبی خیبرپختونخوا کے ضلع ٹانک میں 20 ماہ کی بچی میں پولیو وائرس کی تصدیق ہوئی ہے۔ اس نئے کیس کے بعد رواں برس ملک بھر میں پولیو سے متاثرہ بچوں کی مجموعی تعداد 24 تک پہنچ گئی ہے۔

نیشنل انسٹیٹیوٹ آف ہیلتھ کی ریجنل ریفرنس لیبارٹری کے مطابق متاثرہ بچی کا تعلق یونین کونسل پنگ اے، تحصیل جنڈولہ سے ہے اور وہ بیتنی قبیلے سے تعلق رکھتی ہے۔ بچی کی کوئی سفری تاریخ سامنے نہیں آئی، جس سے ظاہر ہوتا ہے کہ وائرس اب بھی مقامی سطح پر گردش کر رہا ہے۔ تاہم وائرس کے جینیاتی تجزیے کی رپورٹ آنا باقی ہے۔

محکمہ صحت کے اعداد و شمار کے مطابق یہ کیس صرف جنوبی خیبرپختونخوا سے رواں سال رپورٹ ہونے والا 14واں کیس ہے۔ 2025 کے دوران مجموعی طور پر 16 کیس خیبرپختونخوا، 6 سندھ، جبکہ پنجاب اور گلگت بلتستان سے ایک ایک کیس سامنے آچکا ہے۔

نیشنل ایمرجنسی آپریشنز سینٹر کے حکام نے اس صورتحال کو تشویشناک مگر متوقع قرار دیتے ہوئے کہا ہے کہ ٹانک، وزیرستان اور دیگر قبائلی اضلاع میں سیکیورٹی مسائل اور رسائی میں رکاوٹیں پولیو کے مکمل خاتمے کی سب سے بڑی مشکل ہیں۔

پاکستان اور افغانستان دنیا کے وہ دو ممالک ہیں جہاں پولیو وائرس اب بھی موجود ہے۔ عالمی ادارہ صحت اور یونیسف کی معاونت سے انسداد پولیو مہمات جاری ہیں، تاہم شورش زدہ اور دور دراز علاقوں میں اب بھی ہزاروں بچے حفاظتی قطرے پینے سے محروم رہ جاتے ہیں۔