خیبرپختونخوا: بونیر میں موسلا دھار بارش کے بعد سیلابی تباہی، ہائی الرٹ جاری

خیبرپختونخوا کے ضلع بونیر میں پیر بابا اور اطراف کے علاقے گزشتہ رات اچانک سیلابی تباہی کا منظر پیش کرنے لگے، جب موسلا دھار بارش کے بعد ندی نالوں میں شدید طغیانی آگئی اور پانی گھروں، گلیوں اور بازاروں تک پہنچ گیا۔

مساجد سے مقامی آبادی کو فوری انخلا کی ہدایات جاری کی جا رہی ہیں اور درجنوں خاندان محفوظ مقامات کی طرف منتقل ہو رہے ہیں۔ وزیراعلیٰ خیبرپختونخوا علی امین گنڈاپور کی ہدایت پر ضلعی انتظامیہ ہائی الرٹ پر ہے۔ ترجمان وزیراعلیٰ فراز مغل کے مطابق بٹئی اور قدر نگر کے علاقوں سے پانی پیر بابا خوڑ کی طرف تیزی سے بڑھ رہا ہے، جس سے صورتحال مزید خطرناک ہو گئی ہے۔

پانی مرکزی بازار کے عقب اور سڑک کے کنارے تک پہنچ چکا ہے، جس سے شہریوں میں خوف و ہراس پھیل گیا ہے۔ ڈپٹی کمشنر کاشف قیوم، ڈسٹرکٹ ایمرجنسی آفیسر کاشف خان، ایڈیشنل ڈپٹی کمشنر ریلیف، ریسکیو 1122، محکمہ آبپاشی اور پولیس اہلکار موقع پر تعینات ہیں۔

سیلابی ریلوں نے رابطہ سڑکوں کو ناقابلِ عبور بنا دیا ہے اور کئی مقامات پر آمد و رفت مکمل طور پر معطل ہو چکی ہے۔ کھڑی فصلیں، سبزیاں اور باغات پانی میں ڈوب چکے ہیں، جس سے زرعی معیشت شدید متاثر ہوئی ہے۔

ادھر مالاکنڈ کے بٹ خیلہ، الہ ڈھنڈڈھیری اور گردونواح میں بھی گرج چمک کے ساتھ موسلا دھار بارش کا سلسلہ جاری ہے۔ نیشنل ڈیزاسٹر مینجمنٹ اتھارٹی (NDMA) نے 3 ستمبر تک ممکنہ مزید بارشوں کے پیش نظر سیلابی الرٹ برقرار رکھا ہے۔