شاہد آفریدی کی پاک بھارت کرکٹ کے تعلقات پر رائے، شدت پسند سوچ پر تنقید

ایشیا کپ 2025ء میں پاکستان اور بھارت کے درمیان ہونے والے کرکٹ کے بڑے مقابلے سے قبل ہی شائقین میں جوش و خروش بڑھ گیا ہے۔ اس موقع پر قومی کرکٹ ٹیم کے سابق کپتان شاہد آفریدی نے ایک بار پھر سخت بیان دیتے ہوئے شدت پسند بھارتیوں کو تنقید کا نشانہ بنایا ہے۔

ایک نجی ٹی وی چینل پر گفتگو کرتے ہوئے شاہد آفریدی نے "ورلڈ چیمپئن شپ آف لیجنڈز" پر اپنی سخت رائے دوبارہ دہرائی اور اتوار کو ہونے والے پاک بھارت میچ پر بھی بات کی۔ انہوں نے کہا کہ ان کا ہمیشہ سے یہ مؤقف رہا ہے کہ دونوں ممالک کے درمیان کرکٹ کو جاری رہنا چاہیے کیونکہ اس سے تعلقات بہتر ہوتے ہیں۔

شاہد آفریدی نے انگلینڈ میں ہونے والے ایک میچ کا حوالہ دیتے ہوئے کہا، "انگلینڈ میں میچ کے لیے لوگ ٹکٹ خرید چکے تھے، کھلاڑیوں نے پریکٹس بھی کر لی تھی اور پھر بھی بھارت نے کھیلنے سے انکار کر دیا، یہ سوچ کیا تھی؟ میں آج تک نہیں سمجھ سکا۔" انہوں نے بھارتیوں کی شدت پسند سوچ پر طنز کرتے ہوئے کہا کہ "بھارت کے کچھ کھلاڑی آج بھی یہ ثابت کرنے کی کوشش کر رہے ہیں کہ وہ بھارتی ہیں، وہ جب سے ہندوستان میں پیدا ہوئے ہیں یہی ثابت کرنے کی کوشش میں لگے ہیں کہ ہم محب وطن ہیں، وہ کھلاڑی ایشیا کپ میں کمنٹری بھی کر رہے ہیں۔"

ان کا مزید کہنا تھا کہ اگر بھارتی ٹیم ہار جائے تو عوام ان کے گھروں کو جلانے اور دھمکیاں دینے پر اتر آتے ہیں، جب کہ پاکستان میں ایسی روایت نہیں ہے، اور ہم ہار کو صبر و شکر کے ساتھ قبول کر لیتے ہیں۔