اسلام آباد کی انسدادِ دہشت گردی عدالت کا علیمہ خان کے ناقابلِ ضمانت وارنٹ گرفتاری جاری، کل عدالت میں پیش کرنے کا حکم

اسلام آباد کی انسدادِ دہشت گردی عدالت نے بانی چیئرمین پی ٹی آئی عمران خان کی بہن علیمہ خان کے ناقابلِ ضمانت وارنٹ گرفتاری جاری کرتے ہوئے انہیں گرفتار کرکے کل 15 اکتوبر کو عدالت میں پیش کرنے کا حکم دیا ہے۔

تفصیلات کے مطابق، یہ احکامات تھانہ صادق آباد میں درج 26 نومبر ڈی چوک احتجاج کیس کی سماعت کے دوران انسداد دہشت گردی عدالت کے جج امجد علی شاہ نے جاری کیے۔

کیس میں آج علیمہ خان پر فردِ جرم عائد کی جانی تھی، تاہم وہ عدالت میں پیش نہ ہوئیں۔ عدالت نے ان کی حاضری سے استثنیٰ کی درخواست مسترد کرتے ہوئے قرار دیا کہ بار بار طلبی کے باوجود پیش نہ ہونا عدالتی کارروائی میں رکاوٹ کے مترادف ہے۔

عدالت نے تفتیشی افسر کو ناقابلِ ضمانت وارنٹ گرفتاری کے آرڈرز فوری فراہم کرنے کی ہدایت کی۔

پولیس ذرائع کے مطابق، پولیس ٹیم وارنٹ کے ہمراہ اڈیالہ جیل جائے گی، جہاں علیمہ خان توشہ خانہ ٹو کیس کی سماعت کے سلسلے میں موجود ہوں گی۔ بتایا گیا ہے کہ سماعت کے اختتام پر ان کی گرفتاری یا وارنٹ کی تعمیل عمل میں لائی جائے گی۔