گورنر خیبر پختونخوا فیصل کریم کنڈی: وزیراعلیٰ سے حلف نہ لینے کا بیان منسوب کرنا غلط، آئین کے مطابق کردار ادا کروں گا

گورنر خیبر پختونخوا فیصل کریم کنڈی نے وضاحت کی ہے کہ انہوں نے کبھی یہ نہیں کہا کہ وہ نومنتخب وزیراعلیٰ سے حلف نہیں لیں گے۔

کراچی میں میڈیا سے گفتگو کرتے ہوئے فیصل کریم کنڈی نے کہا کہ وہ آئین اور قانون کے مطابق اپنا کردار ادا کریں گے اور آج ہی خیبر پختونخوا روانہ ہو رہے ہیں۔

انہوں نے بتایا کہ وزیراعلیٰ سندھ سے سرکاری طیارے کے استعمال کی درخواست کی گئی تھی اور اس حوالے سے جواب ہائیکورٹ میں جمع کرا دیا گیا ہے۔

بلاول بھٹو کے ساتھ سرگوشی سے متعلق سوال پر گورنر نے مسکراتے ہوئے کہا کہ “کان میں کی گئی باتیں میڈیا کے سامنے نہیں بتائی جاتیں۔”

فیصل کریم کنڈی نے زور دیا کہ وہ ہمیشہ آئین و قانون کی بالادستی کے حامی رہے ہیں اور آئندہ بھی اسی پر عمل کریں گے۔

دوسری جانب پشاور ہائیکورٹ کے چیف جسٹس ایس ایم عتیق شاہ نے نومنتخب وزیراعلیٰ سہیل آفریدی کے حلف سے متعلق محفوظ فیصلہ سناتے ہوئے حکم دیا ہے کہ گورنر بدھ کی شام چار بجے وزیراعلیٰ سے حلف لیں۔

عدالتی فیصلے میں یہ بھی کہا گیا ہے کہ اگر گورنر نے مقررہ وقت پر حلف نہ لیا تو اسمبلی اسپیکر وزیراعلیٰ سے حلف لیں گے۔