پیٹرول 6 روپے 10 پیسے سستا ہونے کا امکان، اوگرا نے سمری تیار کرلی

ملک بھر میں آئندہ پندرہ روز کے لیے پیٹرولیم مصنوعات کی قیمتوں میں نمایاں کمی کا امکان ظاہر کیا جا رہا ہے۔

ذرائع کے مطابق 16 اکتوبر سے پیٹرول کی قیمت میں 6 روپے 10 پیسے فی لیٹر کمی متوقع ہے، جب کہ ہائی اسپیڈ ڈیزل 97 پیسے فی لیٹر تک سستا ہونے کا امکان ہے۔

اسی طرح مٹی کے تیل کی قیمت میں 2 روپے 75 پیسے اور لائٹ ڈیزل آئل کی قیمت میں 1 روپے 64 پیسے فی لیٹر کمی کا امکان ظاہر کیا گیا ہے۔

ذرائع کا کہنا ہے کہ پیٹرولیم انڈسٹری نے اپنی ورکنگ مکمل کر کے اوگرا کو بھجوا دی ہے۔

اوگرا آج شام پیٹرولیم مصنوعات میں ردوبدل کی سمری وزارت خزانہ کو ارسال کرے گی، جو وزارتِ پیٹرولیم کے ذریعے وزیراعظم کی مشاورت سے قیمتوں میں تبدیلی کی حتمی منظوری دے گی۔